ԱԺ ընդդիմադիր խմբակցությունները երթ-հավաք կանցկացնեն

Ազգային ժողովում այսօր լրագրողների հետ ճեպազրույցում ՀՅԴ խմբակցության պատգամավոր Արծվիկ Մինասյանը հայտնեց, որ ԱԺ ընդդիմադիր խմբակցությունները դեկտեմբերի 17-ին պատրաստվում են հատուկ ակցիայի՝ երթ-հավաքի՝ ընդդեմ Պարտադիր կուտակային կենսաթոշակային համակարգի:

Արծվիկ Մինասյանը չբացառեց, որ այդ երթը կարող է վերաճել հանրահավաքի, նաև նշեց, որ նույն օրը պատրաստվում են դիմել Սահմանադրական դատարան՝ վիճարկելու համար օրենքի սահմանադրականությունը:

«Սա հերթական փուլն է. հաշվի առնելով, որ հունվարի 1-ից գործողության մեջ պիտի դրվի` Սահմանադրական դատարանն այս պահին միակ հասանելի մեխանիզմն է, որով հնարավորություն ունենք կասեցնելու օրենքի գործադրումը: Սահմանադրության և Սահմանադրական դատարանի մասին օրենքի հիման վրա ներկայացվող դիմումն իր մեջ պարունակելու է միջնորդություն նաև Սահմանադրական դատարանին՝ առ այն, որ պարտադիր կուտակային բաղադրիչն, ըստ էության, կուտակային կենսաթոշակների մասին օրենքի գործադրումը 2014 թվականի հունվարի 1-ից կասեցվի, մինչև ՍԴ-ում գործի ավարտը»,- ասաց նա:

ՀՅԴ պատգամավորը նշեց, որ սա նախատեսված հնարավորություն է, հետևաբար, սա չի նշանակում, որ դրանով իրենք ավարտում են իրենց պայքարը, այլ նշանակում է, որ եթե ՍԴ-ում իրենք ունենան որոշակի դրական ելք, ապա կզարգացնեն այդ արդյունքը հետագա օրենսդրական գործունեության ընթացքում: Եթե բացասական ելք լինի, նորից կնախաձեռնեն ԱԺ-ում օրենսդրական նախագծերի քննարկում, այդ թվում` նաև արդեն հանրաքվեի շրջանակներում:

«ՍԴ դիմելու համար անհրաժեշտ 27 ստորագրությունների փոխարեն արդեն 32-ը կա, և դեռ էլի պատգամավորներ կան, ովքեր ցանկանում են միանալ: Անառարկելի փաստեր կան, որոնց շնորհիվ օրենքը հակասահմանադրական կճանաչվի»,-նշեց Մինասյանը: