Ինչո՞ւ են փակել հայ-վրացական միջպետական ճանապարհը. գյուղապետի պարզաբանումը

Արդեն տևական ժամանակ է` փակ է Հայաստան-Վրաստան միջպետական ճանապարհի Ոսկեպար-Բաղանիս հատվածը, վարորդները օգտվում են շրջանցիկ ճանապարհից, որը տեղ-տեղ քարուքանդ է և վտանգավոր, հատկապես` ձմռանը:

Լուրեր.com-ը զրուցեց Բաղանիսի գյուղապետ Նարեկ Սահակյանի հետ` ճշտելու, թե երբ կբացվի միջպետական ճանապարհը, և արդյո՞ք շրջանցիկ ճանապարհը պատշաճ մաքրված է:

Սահակյանը մեզ հետ զրույցում նշեց, որ միջպետական ճանապարհն անվտանգության առումներով մինչև օրս փակ է: Թե երբ կբացեն, գյուղապետն ասաց, որ դեռ ժամանակ նշել չի կարող, անորոշ է:

«Ճանապարհը փակ է անվտանգության նկատառումներով: Այս պահին գյուղի վրա կրակոցներ չկան, ամեն ինչ խաղաղ է, անգամ` Բաղանիսի այգիները, որոնք գտնվում են փակ տարածքում, գյուղացիները կարողանում են գնալ և հանգիստ աշխատել»,- ասաց Սահակյանը և հավելեց, որ գյուղացիներն օգտվում են շրջանցիկ ճանապահից, որը փակվել էր մեկ անգամ` եղանակային պայմանների պատճառով, ինչից հետո Նոյեմբերյանի ճանապարհաշինարարական ընկերությունը եկել է, աղ ցանել, մաքրել, և ճանապարհը բացվել է:

Հիշեցնենք, որ Ոսկեպար-Բաղանիս ճանապարհահատվածը փակ է դեռևս նոյեմբերի սկզբից: ՀՀ ՊՆ մամուլի քարտուղար Արծրուն Հովհաննիսյանն ավելի վաղ ճանապարհը փակելու համար ասել էր. «Ճանապարհի այդ հատվածը փակ է, սակայն միայն այն պատճառով, որ անվտանգությունն ամրապնդելու աշխատանքներ են ընթանում, որևէ այլ պատճառ չկա»։