Սպորտային մեքենաների շքերթ՝ Երևանում (ֆոտո)

Երևանի քաղաքապետ Տարոն Մարգարյանը մասնակցել է ««STR» ավտոսիրողների ակումբ» հասարակական կազմակերպության ակումբի 10-ամյակի կապակցությամբ կազմակերպված միջոցառմանը, որն անցկացվել է «Հայաստանի երիտասարդական հիմնադրամ»-ի աջակցությամբ:

Ակումբի հիմնական նպատակը Հայաստանում ավտոսպորտի զարգացումն է, որը ավտոսիրողներին հնարավորություն է տալիս հատուկ վայրերում կազմակերպվող մրցաշարերի և ցուցադրական ելույթներով զգալու արագության շունչը՝ միաժամանակ հորդորելով զերծ մնալ քաղաքային երթևեկության պայմաններում արագության գերազանցումից:

Միջոցառման շրջանակում Հանրապետության հրապարակում նախ կազմակերպվել է սպորտային մեքենաների ցուցադրություն: Քաղաքապետ Տարոն Մարգարյանը, «Հայաստանի երիտասարդական հիմնադրամ»-ի հոգաբարձուների խորհրդի համակարգող, ՀՀ ԱԺ պատգամավոր Կարեն Ավագյանի հետ, ակումբի նախագահի ուղեկցությամբ, շրջել և ծանոթացել է ներկայացված մեքենաներին և տարբեր մրցաշարերում ակումբի անդամների գրանցած հաջողություններին:

Ավտոսիրողների ակումբը քաղաքապետին առաջարկել է անձամբ վարել ցուցադրված մեքենաներից որևէ մեկը: Չմերժելով առաջարկը՝ Տարոն Մարգարյանը վարպետորեն հաղթահարել է ակումբի և ՃՈ կողմից նախապես առանձնացված ճանապարհահատվածը:

Այնուհետ քաղաքապետը ներկա է գտնվել նաև «DRAG-RACING 2013 STR» գավաթի և դրիֆթինգի առաջնության հաղթողների պարգևատրման հանդիսավոր արարողությանը և E դասում հաղթողներին հանձնել մեդալներն ու գավաթը: Շնորհավորելով մեդալակիրներին և ակումբի անդամներին՝ Տարոն Մարգարյանը նշել է, որ ինքը ևս ավտոսիրող է և պատրաստ է շարունակելու աջակցությունը նոր ծրագերի իրականացման գործում:

Շնորհակալություն հայտնելով ցուցաբերվող աջակցության համար՝ ««STR» ավտոսիրողների ակումբ» ՀԿ-ն Տարոն Մարգարյանին շնորհել է ակումբի պատվավոր անդամի կոչում:

«Այս 10 տարիների ընթացքում ակումբը կայացել է և արդեն ունի զգալի արդյունքներ: Երևանի քաղաքապետարանն ակտիվորեն համագործակցում է ավտոսիրողների հետ և պատրաստակամ է շարունակելու աջակցություն ցուցաբերել ակումբին»,-ընդգծել է Տարոն Մարգարյանը:

««STR» ավտոսիրողների ակումբ»-ը պատվոգրեր է հանձնել նաև Երևանի մի շարք վարչական շրջանների ղեկավարներին՝ տարբեր մրցաշարերի անցկացման հարցում ցուցաբերած աջակցության համար: