Այսօր կինոռեժիսոր Արման Մանարյանի ծննդյան օրն է (տեսանյութ)

Կինոռեժիսոր Արման Մանարյանը ծնվել է 1929թ. դեկտեմբերի 15-ին, Իրանի Արաք քաղաքում: Դերասան Երվանդ Մանարյանի եղբայրն է: 1946թ. տեղափոխվել է Խորհրդային Հայաստան: Սովորել է Երևանի Ռ.Մելիքյանի անվան երաժշտական ուսումնարանում: 1954թ. ավարտել է նաև Երևանի Կոմիտասի անվան պետական կոնսերվատորիան, իսկ 1962թ.` Մոսկվայի համամիութենական կինոինստիտուտի ռեժիսորական բաժինը: 1962թ-ից, որպես ռեժիսոր, աշխատել է «Հայֆիլմ» կինոստուդիայում: Նկարահանել է նաև վավերագրական և մուլտիպլիկացիոն ֆիլմեր: Նկարահանած ֆիլմերից առավել հայտնի են` «Տժվժիկ» (1961թ.), «Բյուրականի աստղադիտարանը» (1965թ.), «Կարինե» (1967թ.), «Մորգանի խնամին» (1970թ.) «Հեղնար աղբյուր» (1970թ.), «Վերադարձ» (1972թ.), «Սպիտակ ափեր» (1975թ.), «Արկածներ անտառում» (1977թ.), «Եվս հինգ օր» (1978թ.), «Պատմություն հայելու մասին» (1982թ.), «Հող և ոսկի» (1984թ.), «Կապիտան Առաքել» (1985թ.), «Արցախ» (1988թ.), «Վերականգնում» (1989թ.), «Ընկեր Փանջունի» (1992թ.), «Տգետը» (1995թ.): Գրել է նաև ֆիլմերի սցենարներ: 1975թ. արժանացել է ՀԽՍՀ արվեստի վաստակավոր գործչի կոչմանը: 2010թ. էկրան է բարձրացել նրա նկարահանած «Սասնա ծռեր» մուլտֆիլմը, որի աշխատանքները սկսել էր դեռ 2002թ-ից: 2012թ. արժանացել է «Հայակ» հայկական ամենամյա առաջին կինոմրցանակաբաշխության Հատուկ մրցանակի:

avproduction.am