Պարգևներ գործընկերներին

Այսօր ԱԻ նախարարությունում տեղի է ունեցել հերթական ամենշաբաթյա խորհրդակցությունը, որը վարել է նախարար Արմեն Երիցյանը:

Խրախուսման վերաբերյալ ՀՀ ԱԻ նախարարի հրամանով` ՀՀ ԱԻՆ աշխատակիցների համար հայերեն-անգլերեն զրուցարան մշակելու և պատրաստելու, ինչպես նաև նախարարության հետ սերտորեն համագործակցելու համար ՀՀ ոստիկանության կրթահամալիրի լեզուների ամբիոնի պետ, ոստիկանության գնդապետ Աղավնի Հայրապետյանին շնորհվեց «Համագործակցություն հանուն փրկության» մեդալ: Նույն հրամանով ՀՀ ոստիկանության կրթահամալիրի քոլեջի ոստիկանական միջին մասնագիտական կրթության ֆակուլտետի լեզուների ամբիոնի դասախոս, ոստիկանության լեյտենանտ Ծովինար Առաքելյանին նախարար Ա. Երիցյանը պարգևատրեց ԱԻՆ պատվոգրով:

Շնորհավորելով ոստիկանության աշխատակցուհիներին` Ա. Երիցյանը նշեց.
- Շնորհակալություն եմ հայտնում համագործակցության համար, որ միշտ մեր կողքին կանգնած եք եղել, և վստահ եմ, որ մենք միասին դեռ շատ անելիքներ ունենք:

Խորհրդակցության ընթացքում Փրկարար ծառայության տնօրեն, գեներալ-մայոր Ս. Ազարյանը զեկուցեց շաբաթվա ընթացքում գրանցված պատահարների և կատարված հանձնարարականների մասին։ Լոռվա մարզում ընթացքի մեջ են ճգնաժամային կառավարման կենտրոնի ստեղծման աշխատանքները:

Եկող տարի հանրապետությունում կավելացվի ևս 80 նոր, հակակարկտային կայան, որոնցից 50-ը կտեղադրվի Արմավիրի մարզում: Աշխատանքներ են տարվում հակակարկտային կայանների կառավարման միասնական ժամանակակից թվային համակարգ ստեղծելու ուղղությամբ:

ԱԻՆ մարզային ստորաբաժանումները և ԼՂՀ փրկարար ծառայությունն առցանց զեկուցեցին տեղերում գրանցված պատահարների, օպերատիվ իրավիճակի և առկա խնդիրների մասին: Այսուհետ խորհրդակցություններին առցանց եղանակով ներկա կլինեն նաև ԱԻՆ ճգնաժամային կառավարման պետական ակադեմիայի ուսանողները:

Խորհրդակցությանը հրավիրված էին «Ամերիաբանկի» ներկայացուցիչներ, որոնք համառոտ ներկայացրեցին բանկի կողմից ԱԻՆ աշխատակիցներին առաջարկվող ծառայությունների փաթեթը: