«Ալաշկերտից» հեռացավ միանգամից 9 ֆուտբոլիստ

«Ալաշկերտ» ֆուտբոլային ակումբի ղեկավարությունը երկկողմ համաձայնությամբ խզել է պայմանագրերը հետևյալ ինը ֆուտբոլիստների հետ. Էդվարդ Հովհաննիսյան, Արա Հովհաննիսյան, Բենիկ Հովհաննիսյան, Ռազմիկ Հովհաննիսյան, Ցոլակ Բեգլարյան, Սուրեն Գալստյան, Տիգրան Հախնազարյան, Դավիթ Մինասյան, Գարեգին Մաշումյան. տեղեկացնում է ակումբի պաշտոնական կայքը:

Ազատված ֆուտբոլիստներին կփոխարինեն նորերը: Այդ առումով նշենք, որ ակումբի ղեկավարության և մարզչական շտաբի տեսադաշտում են հանրապետությունում ճանաչված ֆուտբոլիստներ Հովհաննես Գրիգորյանը, Նարեկ Դավթյանը, Արթուր Բարսեղյանը, Գևորգ Օհանյանը, Աղվան Հայրապետյանը, Հայկ Իշխանյանը, Նորայր Գյոզալյանը, պատանի դարպասապահ Տրդատ Ասրյանը: Հնարավոր է, «Ալաշկերտը» համալրի նաև փորձառու Աղվան Մկրտչյանը, ում հետ ակումբի ղեկավարությունը ներկայումս բանակցություններ է վարում: Կան նաև այլ ֆուտբոլիստներ, ովքեր ցանկություն են հայտնել հանդես գալու «Ալաշկերտում»: Ավելի ուշ, երբ հստակություն լինի նրանց հարցում, ակումբը կհրապարակի  նաև նրանց անունները:

Տեղեկացնենք, որ «Ալաշկերտի» ռմբարկու Միհրան Մանասյանը պատրաստվում է փորձաշրջան անցնել արտերկրում:

Կապված ակումբի գլխավոր թիմի նախապատրաստական ծրագրերի հետ նշենք, որ ֆուտբոլիստները մարզումները կվերսկսեն 2014 թ. հունվարի 9-ից: Նախապատրաստական շրջանում կկազմակերպվի երկու արտասահմանյան ուսումնամարզական հավաք Անթալիայի Բելեկ քաղաքում: Առաջինը կանցկացվի հունվարի 20-ից փետրվարի 3-ը, երկրորդը՝ փետրվարի 10-24-ը: