«Ազգ». Մոսկվան կէժանացնի Ուկրաինա առաքվող գազը և կհատկացնի 15 մլրդ դոլար

Հայկական Մամուլ 19 Դեկտեմբեր, 2013 7:47

Ռուսաստանն Ուկրաինային վաճառվող գազի գինը 406-ից իջեցնում է 268,5 դոլարի: Այդ մասին հայտարարվեց Մոսկվայում դեկտեմբերի 17-ին կայացած երկկողմ բանակցությունների ավարտից հետո: Դրանց մասնակցում էին նախագահներ Վլադիմիր Պուտինը եւ Վիկտոր Յանուկովիչը:

Երկկողմ գազային պայմանագրերի լրացուցիչ փաստաթուղթը ստորագրել են ռուսական «Գազպրոմի» եւ ուկրաինական «Նաֆտագազի» ղեկավարները: «Էխո Մոսկվի» ռադիոկայանը մեջբերում է ՌԴ նախագահի այն խոսքը, որ գազի գնի իջեցումը «ժամականավոր որոշում» է:

Բացի դրանից, ՌԴ կառավարությունը իր Ազգային բարեկեցության հիմնադրամի մի մասը կտեղադրի Ուկրաինայում: 2013-2014 թթ. Ռուսաստանը Ուկրաինայից կգնի 15 մլրդ դոլարի պարտատոմսեր: Մինչեւ ընթացիկ շաբաթվա վերջը ձեռք կբերվի արդեն 3 մլրդ դոլարի պարտատոմս:

Առայժմ անհասկանալի է, թե Ռուսաստանը փոխարենն ինչ կստանա Ուկրաինայից: Փորձագետները ենթադրում են, որ կարող են լինել ինչպես քաղաքական, այնպես էլ տնտեսական բնույթի պատասխան քայլեր, օրինակՙ Կիեւի վերջնական հրաժարումը եվրոինտեգրացումից կամ գազի տարանցման համակարգի վերահսկողության հանձնումը Ռուսաստանին:

ՌԴ իշխանությունների հայտարարության համաձայն, երկու երկրների միջպետական հանձնաժողովի նիստում քննարկվել են համապարփակ հարցեր, որոնք Ուկրաինայում հանգեցրել են քաղաքական ճգնաժամի եւ զանգվածային բողոքների: ՌԻԱ գործակալության տվյալներով, Պուտինը եւ Յանուկովիչը չեն քննարկել Մաքսային միությանը Ուկրաինայի միանալու կամ Եվրոմիության հետ Ասոցիացման համաձայնագիր ստորագրելու հարցերը:

Մոսկվայում երկու պետությունների ղեկավարների հանդիպման ժամանակ կնքված համաձայնագրերը եւ ձեռք բերված պայմանավորվածությունները համաշխարհային եւ ռուսաստանյան մի շարք լրատվամիջոցներում մեկնաբանվում են որպես Մոսկվայի կողմից թանկ գնով Կիեւի ձեռքբերում: Եվրոպայում Ռուսաստանին քննադատում են եվրոինտեգրման հարցում Ուկրաինայի վրա ճնշում գործադրելու մեջ եւ կարծիք են հայտնում, թե Պուտինի խոստացած ռուսական վարկերը կհետաձգեն Ուկրաինայի արդիականացումը: ԱՄՆ-ում վստահ են, որ համաձայնագրերը չեն լուծի Ուկրաինայում շարունակվող բողոքների խնդիրը, եւ Յանուկովիչին սպառնում են պատժամիջոցներով:

Մանրամասները` «Ազգ»-ի այսօրվա համարում: