Ես ինձ խաբված եմ զգում. Վարդան Օսկանյան

Այսօր Ազգային ժողովի արտահերթ նիստում ՀՀ ու ՌԴ միջև մի քանի միջազգային պայմանագրերի վավերականացման քննարկման ժամանակ ԱԺ ԲՀԿ խմբակցության պատգամավոր Վարդան Օսկանյանը Էներգետիկայի նախարար Արմեն Մովսիսյանին հարցրեց, թե ինչու իրականությունը չեն ներկայացրել իրենց:

«Մենք միասին աշխատել ենք որպես նախարար, բայց նման բարդ իրավիճակներում երբեք չենք գտնվել: Հնարավոր չէ միշտ իրականությունը ասել, բայց երբեք պետք չէ ստել, վերջիվերջո, մենք պետք է անկեղծ լինենք ԱԺ-ի, ու հիմնականում` մեր ժողովրդի հետ: Ես` որպես պատգամավոր ու քաղաքացի, խաբված եմ զգում: Դուք, միգուցե, փորձեք հակառակի մեջ համոզել, բայց ինքներդ բազմիցս այս ամբիոնից հերքել եք, որ Հայաստանի համար գազի գինը թանկացել է»,-ասաց Օսկանյանը՝ հավելելով, որ իր համար ակնհայտ է, որ տարիների կամ մի տարվա ընթացքում ՀՀ-ն պարտք է կուտակել:

«Հիմա մենք բոլորս գիտենք, որ խորհրդարանը պետք է հավանություն տա նման պարտքի կուտակմանը, բայց մենք տեղյակ չենք եղել այս մասին: Դուք ԱԺ-ի հավանությունը չունեք, հարցն էլ չեք ներկայացրել մեզ: Դուք եկել եք և ուզում եք, որ Ազգային ժողովը վավերացնի. մեզ ուզում եք մասնակից դարձնել մի գործարքի, որը մեզանից թաքցրել եք:

Ես ինձ խաբված եմ զգում ու ուզում եմ իմանալ՝ որն է իրականությունը»,-հարցրեց Օսկանյանը:

Վերջինիս ի պատասխան` Էներգետիկայի և բնական պաշարների նախարար Արմեն Մովսիսյանը պատասխանեց, որ ինքը երբեք չի ասել, որ ՀՀ համար գազի գինը չի բարձրացել:

«Ես ասել եմ, որ գինը չի բարձրանալու ՀՀ համար, և բանակցություններ են գնում, ուրիշ բան երբեք չեմ հայտարարել: Այս ընթացքում բանակցություններ են ընթացել, և միայն հիմա ենք պայմանավորվածություն ձեռք բերել, և հիմա է պարզ դարձել այդ պարտքի կոնկրետ գումարի չափը: Մինչ այդ որևէ բան ներկայացնելը ձեզ իմաստ չուներ»,-ասաց նախարարը՝ հավելելով, որ պարտքը կուտակվել է 2011-ից: