Նոր երաժշտական ներկայացում. «Ժպտացե'ք, կանա'յք» (լուսանկարներ)

2013 թվականին տեղի ունեցավ այն, ինչին բոլորն էլ վաղուց էին սպասում: Մի քանի հայտնի, ճանաչված. սիրված երգիչ-երգչուհիներ, դերասաններ համախմբվեցին և ստեղծեցին մի նոր, ինքնատիպ երաժշտական ներկայացում` «Ժպտացե'ք, կանա'յք» խորագրով: Մյուզիքլում պարզ արտահայտված է այսօրվա հայ կնոջ կերպարը, որտեղ ներկայացվում է արդի ընտանիք` կին-ամուսին փոխհարաբերությունները և կնոջ դերն այսօրվա ընտանիքում:

Ներկայացման ստեղծման հիմնական գաղափարը և մտահաղացումը սիրված ու ճանաչված դերասան, հումորիստ, երգահան Անդրանիկ Շահինյանինն է:

Լուրեր.com-ը զրուցեց ոչ միայն Անդրանիկ Շահինյանի, այլև` մյուզիքլի մնացած մասնակիցների հետ:

Անդրանիկ Շահինյան.

-90 ականներից լինելով հայկական շոու-բիզնեսում` չեմ սխալվի,որ ասեմ` առաջինն էիք,որ համարձակություն ունեցաք ստեղծել և բեմ դուրս գալ կնոջ կերպարով: Սակայն երկարատև դադարից հետո հանդես եք գալիս ոչ միայն նոր ծրագրով,այլև մյուզիքլի տեսքով: Ինչի՞ց ծնվեց այս գաղափարը, և ո՞րն է նրա նպատակը:

-Ասեմ, որ դադար բոլորովին էլ չի եղել, միշտ շարունակել եմ աշխատել և ստեղծագործել: Ստեղծագործող մարդու համար «դադար» չի կարող լինել: Միշտ էլ շարունակել եմ ստեղծագործել, պարբերաբար երգեր եմ գրել ճանաչված ու սիրված երգիչ-երգչուհիների համար` Արմինե Նահապետյան, Զարուհի Բաբայան, Նաիրա Տեր-Կարապետյան, Սոֆի Դանիելյան, Սամվել Գրիգորյան, Սիլվի, Մայա Մարգարյան և այլք:

Ես չեմ կարծում, որ ստեղծագործելը միայն եթեր դուրս գալն է: Ես իմ աշխատանքը շատ եմ սիրում և օրվա մեծ մասն անց եմ կացնում ստեղծագործելով: Պատահական չէր նաև մյուզիքլի ծնունդը: Վերջերս հաճախ զուգերգեր էինք ձայնագում երգչուհի-դերասանուհի Սոֆի Դանիելյանի հետ: Հետո որոշվեց ստեղծել մի նոր երաժշտական ներկայացում, որում կլինի ոչ միայն երգ, այլև` հումոր:

Քանի որ ինձ շատ հաճախ են սկսնակ դերասաններ դիմում համագործակցության համար, որոշեցի նաև հրավիրել նրանցից մի քանիսին: Կարծում եմ` ճիշտ ընտրություն եմ կատարել, ինչի արդյունքն արդեն կայացած ներկայացումն է` իր բազում հրավերներով և հանդիսատեսի ջերմ ընդունելությամբ:

-Քանի որ խոսեցիք հրավերներից և հանդիսատեսից, որտե՞ղ եք համերգներ ունեցել, և հանրությունն ընդունե՞լ է ներկայացումը,քանի որ հանդիսատեսը սովոր է ձեզ տեսնել մոնոլոգներով:

-Չեմ կարծում, որ հանդիսատեսն ինձ տեսել է միայն մոնոլոգներում: Ես ունեցել եմ թիմային ներկայացումներ, որի վառ ապացույցն է իմ տեսաերիզը, որտեղ համագործակցում եմ շատ ու շատ սիրելի և արհեստավարժ դերասանների հետ դեռևս 90-ականներից սկսած:

Ասեմ, որ այս ներկայացման մեջ ներգրավվել են այնպիսի շնորհալի և տաղանդավոր արտիստներ, ինչպիսիք են Տիգրան Կարապետյանը, Հայկ Տեր-Ղազարյանը, Նարինե Ադամյանը, Մարկ Կարապետյանը (հայտնի որպես Մարկ Ալեքս) և Սոֆի Դանիելյանը: Այս երաժշտական նրկայացումով հանդես ենք եկել ՀՀ տարբեր քաղաքներում` բարեգործական նկատառումներով: Երևանում համագործաքցել ենք «Զարթոնք» ընկերության հետ` ելույթ ունենալով տարբեր համերգների շրջանակներում:

Սոֆի Դանիելյան.

-Հանրությունը ձեզ ճանաչում է ոչ միայն որպես երգչուհի, այլև` դերասանուհի: Դուք ձեզ ընկալում եք որպես երգչուհի՞, թե՞ դերասանուհի: Ինչպե՞ս սկսվեց ձեր համագործակցությունը Անդրանիկ Շահինյանի հետ:

-Անդրանիկ Շահինյանի հետ համագործակցում եմ արդեն տասնյակ տարիներ. նա իմ լավագույն երգերի հեղինակն է, իսկ վերջին տարիներին հանդես ենք գալիս նաև զուգերգերով: Բացի աշխատանքը` մենք նաև լավ ընկերներ ենք: Երաժշտական ներկայացում ունենալ նույնիսկ երկար չեմ մտածել, քանի որ նրա հետ աշխատելը գերագույն հաճույք եմ համարում և տեղում համաձայնվել եմ մեծ սիրով:

Այստեղ կրկին մարմնավորում եմ մոր կերպար, որը, կարծես թե, ինձ մոտ լավ է ստացվում, հատկապես, որ վերջերս «Արմենիա» հեռուստաընկերության եթերում հեռարձակված «Դժվար ապրուստ» հեռուստասերիալում նման փորձ արդեն ունեցել էի: Հանդիսատեսն արդեն ծանոթ էր իմ բեմական կեցվացքին: Ինչ վերաբերում է, թե ես ինձ ինչպես եմ ընկալում, կասեմ ավելին` ունեմ երաժշտական կրթություն և ներկայումս էլ սովորում եմ Երևանի պետական ջազային արվեստների քոլեջ-ստուդիայի դերասանական վարպետության բաժնում: Իսկ գնահատականները թողնում եմ հանդիսատեսի դատին:

Ես իմ աշխատանքին շատ սիրով ու պատասխանատվությամբ եմ վերաբերվում, հատկապես` բեմին:

Մարկ Կարապետյան`Մարկ Ալեքս.

-Դուք հիմնականում կատարում եք արտասահմանյան երգեր: Ներկայացման մեջ ինչպե՞ս ընդգրկվեցիք, և ունե՞ք երգի հատված ներկայացման մեջ:

Թիմային Աշխատանքին ինչպե՞ս եք վերաբերվում:

-Ես 13 տարեկանից եմ երգում և 13 տարեկանից էլ աշխատել եմ Գյումրիի Վարդան Աճեմնյանի անվան պետական դրամատիկական թատրոնում որպես դերասան: Երգում եմ հիմնականում արտասահմանյան ոճի մեջ, քանի որ կա հոգեվիճակ ասվածը և տվյալ երաժշտությունը մոտ է ինձ: Անդրանիկին ճանաչում եմ շատ վաղուց` մոտ 12տարի, որից 9-ը արդեն համագործակցում ենք:

Ներկայացումը շատ հետաքրքիր է իր լուծումներով և թեմատիկ է այսօրվա իրականության հետ, արդիական թեմա է, կին և տղամարդ հարաբերությունների մասին է` երկու սեռի դերը հասարակության մեջ, կյանքի ընկալումը կոնկրետ մեր հասարակության կողմից: Իհարկե, սա հումորային ներկայացում է` ուրախ և, ամենակարեվորը, խելացի: Սա մյուզիքլ է, որտեղ հնչելու են տարբեր ոճերի երգեր, այդ թվում` և համաշխարհային հիթեր, որտեղ և ես որպես արտասահմանյան ոճի երգիչ ունեմ իմ կերպարը տվյալ ներկայացման մեջ:

Միշտ սիրել եմ թիմային աշխատանքը, քանի որ ստեղծագործական աշխատանքը իմ կյանքում միշտ է եղել (ինչպես նշեցի, արդեն 13 տարեկանից): Կարծում եմ` տվյալ ներկայացումը դեռ երկար կմնա մարդկանց հիշողության մեջ:

Հայկ Տեր-Ղազարյան

-Ինչպե՞ս սկսվեց համագործակցությունը Անդրանիկ Շահինյանի հետ, և ինչպե՞ս ընդգրկվեցիք մյուզիքլում:

-Ծնվելով և ապրելով սովետական հասարակարգում, անցնելով 90ականների թոհուբոհը` լի բուռն դժվարություններով, ստիպված եղա մասնագիտության ընտրության հարցում կանգնել ընտրության առջև: Երկրի իրավիճակից ելնելով` ստիպված եղա զբաղվել բիզնեսով, բայց չմոռացա իմ նախնտրությունների մասին: Սերը երաժշտության և բեմի հանդեպ իմ մեջ արթնացրեց նաև երաժիշտ-դերասանին: Չնայած երաժշտական կրթությունը կիսատ թողեցի, սակայն սերը արվեստի հանդեպ այնքան մեծ էր, որ միշտ փորձում եմ համատեղել բիզնեսն ու արվեստը: Մասնակցել եմ բազում համերգների, մինչ օրս էլ համագորցակցում եմ շատ երաժիշտների հետ որպես կիթարիստ: Եղել եմ տարբեր

երկրներում: Անդրանիկ Շահինյանի հետ ծանոթ եմ ավելի քան 10 տարի: Ներկայացման մեջ հանդես եմ գալիս որպես Անդրանիկ Շահինյանի և Մարկ Կարապետյանի որդի:

Տիգրան Կարապետյան.

-Ինչքա՞ն ժամանակ է` համագործաքցում եք Անդրանիկ Շահինյանի հետ, և ինչպե՞ս ընդգրկվեցիք երաժշտական ներկայացման մեջ:

-Ինչպես սովորական հայ տղա` իր սովորույթներով, դաստիարակությամբ, նաև` շրջապատով, բեմը և դերասան լինելը ինձ համար և երազանք էր և անիրական երեվույթ: Ամեն ինչ իմ կյանքում սկսվեց «Արի Ամուսնանանք» հեռուստապրոյեկտից: Երբ ինձ հրավիրեցին մասնակցելու այդ հաղորդմանը, սկզբից նույնիսկ շատ տարօրինակ թվաց: Սակայն, ինչպես ժողովուրդն է ասում, ախորժակը բացվում է ուտելուց: Ինձ շատ դուր եկավ հեռուստատեսությունով հանդես գալը. ավելի անակնկալ էր, երբ արհեստավարժ մարդիկ սկսեցին ինձ նկատել և համագործակցության առաջարկներ անել:

Երբ իմացա Անդրանիկ Շահինյանի հումորային երաժշտական ներկայացման մասին, ինքս դիմեցի իրեն և ի զարմանս ինձ` ընդունվեցի և ստացա ընտանիքում պարապուրդի մատնված հոր դերը, որը անընդհատ ստիպում է կնոջը աշխատել, իսկ դստերը` ամուսնանալ: Անդրանիկի հետ աշխատում եմ մեկ տարուց ավելի և շատ հաճույքով:

Նարինե Ադամյան.

-Ինչպե՞ս սկսվեց համագործակցությունը «Ժպտացեք Կանայք» երաժշտական հումորային ներկայացման և Անդրանիկ Շահինյանի հետ:

-Ծնողներս միշտ դեմ են եղել իմ` դերասանուհի դառնալուն, չնայած ես միշտ երազել եմ դերասանուհի դառնալ: Փոքր հասակում, երբ դիտում էի Անդրանիկ Շահինյանի տեսաերիզները, `ինքս էի կերտում նրա դերերը: Ծնողներս կարծում էին մեծանալով ես կմոռանամ, սակայն տարիների ընթացքում սերը դեպի մեծ բեմ և արվեստ ավելի արմատացավ իմ մեջ: Մանկուց հաճախել եմ տարբեր թատերական խմբակներ, և այժմ պրոֆեսիոնալ պարուհի եմ: Առաջին քայլերս սկսել եմ «Ֆանտազիա» պարային համույթից, և 7տարի է արդեն ինչ պարում եմ:

Բազմիցս դիմել եմ Անդրանիկ Շահինյանին, որ ինձ ընդգրկի իր մանրապատումներում և վերջապես երազանքս իրականացավ` ընտրվեցի և ընդգրկվեցի ներկայացման մեջ, որում խաղում եմ Տիգրան Կարապետյանի և Սոֆի Դանիելյանի դստեր դերը. վերջինիս անընդհատ ստիպում են ամուսնանալ, ինչը արդի է այսօրվա հայ ընտանիքներում:

Ալիսա Հակոբյան

{gallery}muzicl{/gallery}