ԱԺ նախագահի դիրիժորական փայտիկը, դհոլաբաբուխանյանական հողաթափիկ ինֆուզորիաներն ու պատգամավորների՝ կալոշի արաղից ուռած դեմքերը

Երեկվա ԱԺ նիստի քաղաքական հետևանքների մասին շատ է խոսվել ու գրվել, այսօր կցանկանայի խոսել այն տխուր իրավիճակի մասին, որ ՀՀԿ-ն ի ցույց դրեց իր խմբակցության ներսում:

ՀՀԿ-ն երեկ բացահայտեց իր ներքին քաղաքական և կադրային զինանոցի ամբողջ սնանկությունը: Խորհրդարանական մեծամասնությունը հերթական անգամ ապացուցեց, որ գլխաքանակների մի հսկայական խառնամբոխ վարժեցված է հատուկ կոճակ սեղմելու համար: Անուղեղ, անինտելեկտ, անողնաշար գոյացությունների մի ամբողջ բոլուկ խորհրդարան է գալիս բացառապես հերթական կոստյումը արևին փռելու և իր անուղեղ գոյացությունը քաղաքական պապաներին ի ցույց դնելու համար: Եվ մշտապես նույն տհաճ, կալոշի արաղից ուռած դեմքերը՝ Հովիկ Աբրահամյանի դիրիժորական փայտիկին հլու-հնազանդ: Անգամ չեն փորձում փաթեթավորել, գոնե գեղեցիկ, մի քիչ ինտելեկտուալ տեսք տալ խմբակցությանը:

Եթե մարդը գոնե կարողանում է երկու նախադասություն կապել իրար, ունի բանավեճի կուլտուրա, իր քաղաքական թիմի գործողություններում որոշակի տրամաբանություն է տեսնում և փորձում է համոզել դիմացինին, անշուշտ, նորմալ է: Բոլոր երկրներում էլ իշխանությունների քայլերն արժանանում են հակազդեցության, սակայն քաղաքական մեծամասնությունը, ամեն դեպքում, կարողանում է հոդաբաշխ խոսել իր ժողովրդի հետ: ՀՀԿ-ում կիրթ, ինտելեկտուալ պատգամավորների պակասն այնքան ակնհայտ է, որ Սերժ Սարգսյանը պետք է լուրջ մտորի, թե ինչ խառնամբոխի հետ է կապում իր հույսերը: Այդ գլխաքանակը նրան լքելու է առաջին իսկ ազդակի դեպքում, երբ լափամանի պարունակությունը համալրող նոր խոզապահ ի հայտ գա...

Ամբողջ խմբակցության մեջ ընդամենը մի քանի ինտելեկտուալ, զարգացած պատգամավոր կա, այն էլ` բացառապես երիտասարդների տեսքով. դհոլաբաբուխանյանական հողաթափիկ ինֆուզորիաների դասի լպրծուն հռետորների մասին խոսելն անիմաստ է, իհարկե: Որքան ենք մենք համաձայն նրանց գործունեությանը, որքան ոչ, դա այլ խնդիր է, բայց քննարկումների ժամանակ գոնե լսվում է գրագետ խոսք, ոչ թե թլոշներից մեկի սիկ*-ը: Արդյոք նմանատիպ խորհրդարանականները իշխանություններին խայտառակելուց բացի ինչ-որ բան տալի՞ս են:

Սերժ Սարգսյանը լրջորեն պետք է մտորի իր քաղաքական ապագայի հարցով:

Եթե, իհարկե, արդեն ուշ չէ...