Հրանտ Դինքի գործով անցնող կասկածյալը սպառնացել է նոր անուններ բացահայտել

Ստամբուլի «Ակօս» թերթի նախկին խմբագրապետ Հրանտ Դինքի սպանության գործով կասկածյալ Էրհան Թունջելը կալանավայրից նամակ է ուղարկել ոստիկանության գլխավոր տնօրենության հետախուզական վարչության պետ Էնգին Դինչին` սպառնալով, որ եթե դատական հաջորդ նիստի ժամանակ իրեն չազատեն եւ բարոյական վնասի փոխհատուցում չտան, ապա հանդես կգա սպանությանը մասնակից նոր անունների բացահայտմամբ: Այս մասին, ինչպես հաղորդում է «Արմենպրես»-ը, հայտնում է թուրքական «Թարաֆ» թերթը:

Ավելի վաղ տված ցուցմունքներում Էրհան Թունջելը հայտարարել էր, որ Հրանտ Դինքի սպանության պատասխանատուն Տրապիզոնի քաղաքային ոստիկանության պետ Ռամազան Աքյուրեքի գլխավորությամբ գործող հանցավոր խումբն է:

Նամակում Թունջելը Դինչին սպառնացել է, թե ինքը կբացահայտի, որ Դինքի սպանությունը կատարել է «Էրգենեքոն» ազգայնական խմբավորումից «բարձր կանգնած կառույցը»: «Գոնե մեկ անգամ արա մեծ եղբոր անելիքը, եւ ես, ինչպես միշտ, կանեմ կրտսեր եղբոր իմ անելիքը: Հակառակ դեպքում` ցուցմունք կտամ, որ Դինքի սպանությունը ծրագրել է «Էրգենեքոն»-ից բարձր կանգնած խմբավորումը»,- նամակում նշել է Թունջելը:

Թերթը մեկնաբանել է, որ Դինքի գործով որպես հրահրիչ անցնող Էրհան Թունջելը նամակում բացահայտորեն սպառնում է ոստիկանության պաշտոնյային եւ նշում, որ նա է եղել իրեն օգտագործողներից մեկը:

Ստամբուլի «Ակօս» թերթի հայազգի խմբագրապետ Հրանտ Դինքը սպանվել է 2007 թ. հունվարի 19-ին խմբագրատան առջեւ: Նրան սպանելու գլխավոր պատճառը Հայոց ցեղասպանության մասին բարձրաձայնելն էր:

Մանրամասները` «Ազգ»-ի այսօրվա համարում: