Արտաշատի յուղման կետերը և ԱԺ նախագահի պատժելու մոլուցքը

Երեկ տեղեկություններ եմ ստացել, որ ԱԺ նախագահ Հովիկ Աբրահամյանը հրահանգել է կապնվել ԱԺ հայտնի նիստում ի նշան բողոքի լրագրողների օթյակում ակցիա իրականացրած լրագրողների ղեկավարների հետ և պահանջել՝ պատժել լրագրողներին:

Զարմանում եմ նեղ մտածելակերպի վրա՝ ինչպես կարող է լրագրողը նման վարքագիծ դրսևորել՝ չունենալով գլխավոր խմբագրի համաձայնությունն ու աջակցությունը: Սա ԱԺ-ի «բարդակը» չէ, որ կոճակ սեղմողներին ճիպոտներով քշեն խորհրդարան և նրանց հորանջի ու բառաչի ներքո հակապետական օրենքներ քվեարկեն: Սա լրատվամիջոց է, որտեղ ամեն արդար բան խրախուսվում է ղեկավարության կողմից և ցանկացած ոտնձգություն մեր աշխատակիցների իրավունքների նկատմամբ ստանում է ցավոտ հակահարվածներ...

Մեր լրատվամիջոցը Արտաշատի յուղման կետը չէ, որտեղ կետի «նայողը» կարող է հրահանգել յուղ փոխողին՝ ինչ որակի յուղ լցնել մեքենայի շարժիչի մեջ: Մեր խմբագրությունը կոլեգիալ մարմին է, որտեղ ընդունվում են որոշումներ՝ լսելով բոլոր կողմերին:

Մենք մեր լրագրողների ազատ կամարտահայտման իրավունքը երբեք չենք սահմանափակում: Ավելին, աջակցում ենք ցանկացած նախաձեռնություն, որը կարող է օգնել պետության կայացմանը: Պետություն, որի կործանման համար Հովիկ Աբրահամյանը ջանք չի խնայել՝ անգամ ձեռքով քվեարկելով: Պետություն, որի ղեկավարների որևէ գործողություն տրամաբանված չէ: Եվ կողքից նայել, թե ինչպես է բռնաբարվում արյան գնով ձեռք բերված առանց այն էլ խղճուկ անկախությունը՝ մենք չենք կարող...

Անկախ նրանից, թե ով ինչպես է գնահատում լրագրողների հայտնի գործողությունը՝ ես ողջունում եմնրանց քաղաքացիական ակտիվությունը և խորհուրդ չեմ տալիս ԱԺ ղեկավարությանը՝ նրանց պատժելու ուղղությամբ որևէ գործընթաց սկսելու: Հավատացեք, հակազդեցությունը լինելու է կտրուկ, և դրանից հետո միգուցե յուրաքանչյուրդ կվերադառնաք ձեր կարիերայի սկզբի յուղման կետերն ու ուսուցչանոցները և երկար կմտորեք, թե ինչ բան է քաղաքացիական ակտիվությունը, անկախության վաճառքն ու լրատվամիջոցների բոստանը քար նետելը...

Փորձեք երբեմն մի քիչ մտածել և տրամաբանել: Եթե, իհարկե, դրա համար ձեզանից գերմարդկային ճիգեր չեն պահանջվում:

Վարուժան Բաբաջանյան