Գաֆէսճեան արվեստի կենտրոնը հայտարարում է տոնական միջոցառումների մասին

Ամանորի և Սուրբ Ծննդյան տոներին ընդառաջ' Գաֆէսճեան արվեստի կենտրոնում տեղի կունենան տոնական միջոցառումներ:

Դեկտեմբերի 27-ին, ժամը 20:00-ին կենտրոնի հատուկ միջոցառումների սրահում տեղի կունենա այս տարվա վերջին համերգը: «Զանգակներ» խումբը (գեղ. ղեկավար՝ Շահե Քեշիշյան) կներկայացնի յուրօրինակ տոնական համերգային ծրագիր՝ «Սուրբ Ծննդյան զանգեր» խորագրի ներքո: Կհնչեն Կոմիտասի, Յոհան Պախելբելի, Յոհան Բրամսի, Ալեքսանդր Սկրյաբինի, Պյոտր Չայկովսկու ստեղծագործությունները՝ հագեցած Սուրբ Ծննդի և Ամանորի շնչով, ինչպես նաև Աստոր Պիացոլայի, Չիկ Կորեայի, Բիթլզի, Ռոբերտ Ամիրխանյանի գլուխգործոցները:

Դեկտեմբերի 28-ին, ժամը 14:00-ին, Գաֆէսճեան արվեստի կենտրոնի Խանջյան սրահում կկազմակերպվի ավանդական ստեղծագործական ծրագիր Ձմեռ Պապի ու Ձյունանուշի մասնակցությամբ, ովքեր կօգնեն երեխաներին ստեղծել Ամանորի զարդարանքներ:

Բաժանվելով տարիքային խմբերի՝ երեխաները կստեղծեն ամանորի դիմակներ և բացիկներ, իսկ ծրագրի վերջում նրանց աշխատանքներով կզարդարվի Գաֆէսճեան արվեստի կենտրոնի Այցելուների կենտրոնում տեղադրված տոնածառը:

Գաֆէսճեան արվեստի կենտրոնի առաքելությունն է ժամանակակից արվեստի լավագույն նմուշները ցուցադրել Հայաստանում և աշխարհին ներկայացնել հայկական մշակույթի լավագույնը: 2009 թվականի նոյեմբերին տեղի ունեցած բացումից առ այսօր Գաֆէսճեան արվեստի կենտրոնը, հավատարիմ իր առաքելությանը, կազմակերպում է բազմազան ցուցահանդեսներ, ներկայացնում ժամանակակից արվեստի յուրօրինակ գործեր, իրականացնում ֆիլմերի ցուցադրություններ, համերգաշարեր, դասախոսություններ և կրթական ծրագրեր: Գաֆէսճեան արվեստի կենտրոնի տարեկան այցելությունների թիվը գերազանցում է 1,000,000: