«Սիրուն չէ» продакшн представляет

Նորից Տարոն Մարգարյան, և նորից «Սիրուն չէ»...:

Այսօր Երևանի քաղաքապետ Տարոն Մարգարյանի ատենախոսության պաշտպանությունը լուսաբանել ցանկացող լրագրողները կոշտ դիմադրության են հանդիպել տեղի «ուսանողների» կողմից: Իհարկե, կոշտ ասելը բավականին մեղմ է` հայհոյանքներ, քաշքշուկ, գոռում- գոչյուններ... իսկ ներսում բոլորից թաքուն իր գործն էր գլուխ բերում Տարոն Մարգարյանը, ինչը, բնականաբար, բարեհաջող ավարտ ունեցավ:

«Ուսանողությունն ընդդեմ լրագրողների» հերոսական մարտին իրենց բարի ավանդն ունեցան ինչպես ՀՊՏՀ-ի ռեկտոր Կորյուն Աթոյանը, այնպես էլ երիտասարդ ՀՀԿ-ականները, ովքեր, ինչպես զգացվեց, ՀՀԿ-ում առաջ գնալու մեծ պոտենցիալ ունեն:

Դե իսկ գլխավոր դերում ՀՊՏՀ-ի ՈւԽ նախագահ և ռեկտորի խորհրդական ՀՀԿ-ական Սևակ Խաչատրյանն էր, ով աչքի էր ընկել նաև նախագահական ընտրություններից հետո դասադուլների դեմ պայքարում: Դե քանի դեռ ինքը ՀՊՏՀ-ում է, ՀՀԿ-ն ԲՈւՀ-ում խնդիր չունի:

Իրականում խնդիրն ավելի համակարգային և լուրջ է. փաստորեն, մեր ուսանողական էլիտան մեծամասամբ կառավարելի է` անգամ երբ նրանց միջամտությունը պարտադրված չէ: Ուսանողները` հասարակության սերուցքը` կճկվեն ու այն դիրքը կընդունեն, որն այդ պահին պետք է: Եվ սա է ազգի ողբերգությունը:

Դե ինչ, մասնակիցներին և ռեկտորին պետք է ընդամենը մի բան հիշեցնել.

ՀՀ Քրեական օրենսգիրք

Հոդված 164.

Լրագրողի մասնագիտական օրինական գործունեությանը խոչընդոտելը

1. Լրագրողի մասնագիտական օրինական գործունեությանը խոչընդոտելը կամ նրան տեղեկություններ տարածելուն կամ տարածելուց հրաժարվելուն հարկադրելը՝ պատժվում է տուգանքով՝ նվազագույն աշխատավարձի երկուհարյուրապատիկից չորսհարյուրապատիկի չափով:

2. Նույն արարքները, որոնք կատարել է պաշտոնատար անձն իր պաշտոնեական դիրքն օգտագործելով՝ պատժվում են տուգանքով՝ նվազագույն աշխատավարձի չորսհարյուրապատիկից յոթհարյուրապատիկի չափով, կամ ազատազրկմամբ՝ առավելագույնը երեք տարի ժամկետով՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը երեք տարի ժամկետով կամ առանց դրա:

3. Սույն հոդվածի առաջին և երկրորդ մասերով նախատեսված արարքները, որոնք կատարվել են լրագրողի կամ նրա մերձավորի կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով' պատժվում են ազատազրկմամբ' երեքից յոթ տարի ժամկետով:

Եվ վերջապես, խորհուրդ նմանատիպ իրավիճակում հայտնված պաշտոնյաներին` «Զորքը բերեք, զորքը»:

Հուսանք, որ հաշվի առնելով ռեկտորի` ուսանողների վարքը կառավարելու անզորությունը կամ նրանց սանձելու ցանկության բացակայությունը` ԿԳՆ-ն որոշում կկայացնի ազատվելու «գողական» ռեկտորից:

Ն. Ա.

Առաջարկում ենք կարդալ նաև` Ինչպես էին լրագրողներից «պաշտպանում» Տարոն Մարգարյանին (տեսանյութ)

ՀՊՏՀ-ի ռեկտորի պարզաբանումը լրագրողների և ուսանողների միջև տեղի ունեցածի վերաբերյալ