ԼՂՀ վարչապետը` ՀՀ-ի` Մաքսային միությանը անդամակցելու մասին

ԼՂՀ վարչապետ Արա Հարությունյանի' այսօր հրավիրած տարեվերջյան մամուլի ասուլիսում ամփոփվեց անցնող տնտեսական տարին: Ա. Հարությունյանի խոսքով' բյուջեն կատարվել է, խնդիրները չեն խանգարել նախատեսված բոլոր, մասնավորապես, սոցիալական ծրագրերի իրագործմանը: Վարչապետը ամփոփվող տարվա կարևոր հաջողություններից մեկը համարում է ՀՆԱ-ի 9% աճը, ինչը հիմնականում ապահովվել է շինարարության հաշվին: Կառավարության ղեկավարը անդրադարձավ ԱԺ-ի հավանությանն արժանացած երկրի գլխավոր ֆինանսական փաստաթղթին, նշելով, որ գալիք տարում ևս նախատեսվում է ապահովել տնտեսական կայուն աճ, նոր աշխատատեղերի ավելացում և կարևորագույն սոցիալական ծրագրերի իրականացում:

Պատասխանելով ՀՀ-ի' Մաքսային միությանը անդամակցելու հարցին, Ա. Հարությունյանը նշեց, որ Արցախի տնտեսական ինտեգրման ուղեգիծը որևէ փոփոխություն չի կրելու, ընդհակառակը, Հայաստանում և Արցախում նոր հնարավորություններ են ստեղծվելու տնտեսության ակտիվացման համար, մանավանդ, որ տեղական արտադրանքի հիմնական մասը արտահանվում է Ռուսաստան:

Ա. Հարությունյանը անդրադարձավ հիփոթեքային վարկավորման ծրագրում նախատեսվող փոփոխություններին, որոնց համաձայն' արտոնություններ են սպասվում արտարժույթով վարկ վերցրած քաղաքացիներին: Նրանք առաջիկա 5 տարիների ընթացքում մարելու են միայն մայր գումարը, իսկ տոկոսները սուբսիդավորվելու են կառավարության կողմից: Երկարաձգվելու են նաև վարկի մարման ժամկետները, տոկոսադրույքները դեռևս մնալու են անփոփոխ:

Պատասխանելով լրագրողների բազմաթիվ այլ հարցերի' կառավարության ղեկավարը պարզաբանել և ներկայացրել է տարբեր բնագավառներում իրականացված ու կատարվելիք ծրագրերը, մեկնաբանել առանձին հիմնահարցեր:

Հանդիպման ավարտին Ա. Հարությունյանը շնորհավորել է ԶԼՄ-ների ներկայացուցիչներին, նրանց մաղթել խաղաղություն և նորանոր հաջողություններ: