Բարին ու խաղաղությունը մաղթենք մեր սիրելի Արցախին և հայկական ողջ աշխարհին. ԼՂՀ վարչապետի շնորհավորական ուղերձը

Սիրելի արցախցիներ, 

Հրաժեշտ ենք տալիս 2013 թվականին, մի տարի, որը եղավ հերթական կարևոր ժամանակահատվածը մեր երկրի առջև ծառացած հիմնախնդիրները լուծելու ճանապարհին: Առավելապես ստեղծարար աշխատանքով հագեցած անցնող 12 ամիսներին մեզ հաջողվեց հանրապետությունում ապահովել տնտեսական զգալի աճ, լուրջ ձեռքբերումների հասնել մի շարք ասպարեզներում: Դրանք երբեմն առաջին հայացքից տեսանելի չեն, որովհետև ոչ տեղական հանգամանքներով պայմանավորված գնաճը հաճախ ստվերում է մեր շատ հաջողություններ: Հուսանք, որ սա ժամանակավոր երևույթ է, և մոտ ապագայում մեր առաջընթացը կլինի առավել շոշափելի:

Կառավարության գործունեության առաջնահերթությունն է մեր քաղաքացիների կենսամակարդակի բարձրացումը, սոցիալական ապահովության և անվտանգության անշեղ ամրապնդումը: Այս ոլորտներում պետությունը կատարում է հսկայական ներդրումներ և իրագործում տասնյակից ավելի նշանակալից ծրագրեր: Մենք պետք է առաջ ընթանանք շարունակական բարեփոխումների ճանապարհով' հետ չմնալու քաղաքակրթական ընդհանուր զարգացումներից: Այդ տեսանկյունից, կարծում եմ, լավ ու ցանկալի տարի կդառնա 2014 թվականը: Մենք նախատեսում ենք պահանջված բարեփոխումներ աշխատավարձերի ու կենսաթոշակների համակարգերում' դրանք զգալիորեն բարձրացնելու և առավել արդարացի բաշխելու սկզբունքներով: Մեծ միջոցներ կհատկացնենք փոքր ու միջին ձեռնարկատիրության զարգացմանը: Մենք մշտապես հետամուտ կլինենք, որ մեր քաղաքացիները իրենց ներկան ու ապագան շաղկապված տեսնեն գերազանցապես հայրենիքի հետ և այստեղ գտնեն իրենց երջանկությունն ու կյանքի իմաստը: Արցախյան խնդրի վերջնական կարգավորումը մեզ թելադրում է սեփական հողի վրա գործել ավելի հեռատեսորեն ու նպատակասլաց:

Թանկագին հայրենակիցներ.

Նոր տարին ընտանեկան հաճելի ու գեղեցիկ տոն է նախևառաջ: Ուստի մաղթում եմ, որ ձեր ընտանիքներում իշխեն սերն ու համերաշխությունը, բարեկեցությունն ու լավատեսությունը: Բարին ու խաղաղությունը մաղթենք մեր սիրելի Արցախին և հայկական ողջ աշխարհին: Թող Աստված հավերժ պահապան լինի մեր ժողովրդին:

Ջերմ շնորհավորանքներս ձեզ' Ամանորի և Սուրբ ծննդյան տոների առթիվ: