«Ինչպիսի նվիրումով խաղացել եմ Հայաստանի հավաքականում, այնպես էլ կաշխատեմ որպես մարզիչ». Հովսեփյան

Ինչպես արդեն հայտնել ենք, «Փյունիկի» գլխավոր մարզիչ է նշանակվել նախկինում հայտնի ֆուտբոլիստ Սարգիս Հովսեփյանը: Նա «Փյունիկի» պաշտոնական կայքին տված հարցազրույցում ասաց.

- Ինձ համար շատ մեծ պատիվ է աշխատել «Փյունիկում»: Շնորհակալ եմ ղեկավարությանը նման վստահության համար: Ես երկար տարիներ պաշտպանել եմ իմ հարազատ ակումբի պատիվը` որպես ֆուտբոլիստ, այժմ կատարելու եմ գլխավոր մարզչի պարտականությունները: Ինչպիսի նվիրումով ես խաղացել եմ «Փյունիկում» և ազգային հավաքականում, այնպես էլ աշխատելու եմ որպես մարզիչ:

Ճիշտ է, հիմա «Փյունիկն» իր համար անսովոր տեղ է զբաղեցնում մրցաշարային աղյուսակում, սակայն միասնական ուժերով մենք կփորձենք դուրս գալ առաջատար դիրքեր: Դրա համար ակումբն ունի համապատասխան ներուժ:

Օգտվելով առիթից` ցանկանում եմ շնորհավորել մեր բոլորիս Ամանորն ու Սուրբ ծնունդը: Ցանկանում եմ առողջություն և խաղաղություն, իսկ մեր հայկական ֆուտբոլին հաղթանակներ` միջազգային ասպարեզում, ֆուտբոլիստներին՝ առանց վնասվածքների ելույթներ,- Հովսեփյանի խոսքերը մեջբերում է ակումբի պաշտոնական կայքը: