Տիգրան «քըխ» գործելաոճը բացառապես ԲՀԿ-ի գոյության արդարացման հուսահատ ճիգ է

Ինքս վարչապետի քննադատներից եմ, ով հետևում է մեր կայքերի գործունեությանը՝ անպայման նկատած կլինի: Սակայն զուգահեռաբար չեմ մոռանում Սերժ Սարգսյանին, Հովիկ Աբրահամյանին և մյուսների ճոխ տեսականին, որոնք պետության թշվառ վիճակի պատասխանատու ամբողջ շղթան են՝ յուրաքանչյուրը իր տեղում:

Այս ֆոնի վրա բավական հետաքրքիր է ԲՀԿ ղեկավարի կողմից քննադատության սլաքը միայն Տիգրան Սարգսյանի դեմ ուղղելու մարտավարությունը: Սրտխառնոց է առաջացնում այն երևույթը, որ Ծառուկյանը հոտընկայս խմում է Սերժ Սարգսյանի կենացը, բայց իր լրատվամիջոցներին հրահանգում է որպես երկրի վիճակի պատասխանատու ներկայացնել Տիգրան Սարգսյանին: Բավականին պարզունակ և մանկամիտ քաղաքականություն է: Երկրի վիճակի պատասխանատուն առավելապես Ծառուկյանի կողմից խնամքով պաշտպանվող Սերժ Սարգսյանն է, հաջորդը՝ խնամի Հովիկը, որը երկրի երկրորդ դեմքն է, հետո միայն Տիգրան Սարգսյանը, որը վերոհիշյալ «սրբերի» ուղղորդած քաղաքականության իրականացնողն է բացառապես: Բայց վարչապետը շատ հեշտ տարբերակ է՝ միաժամանակ հաճույք ստանալու և կույս մնալու տեսակետից: Քննադատության մեծ չափաբաժին և ընդդիմադիր ելույթների հիմքեր՝ ինչքան ուզես, միաժամանակ Սերժ Սարգսյանն ու Հովիկ Աբրահամյանը հեռու են պահվում թիրախից: Փաստորեն՝ այստեղ է կայանում այս կուսակցության այլընտրանք լինելը:

Մինչդեռ իրերն իրենց անուններով կոչելու դեպքում քննադատությունը պետք է հնչեր մեր անկախությունը բռնաբարող իշխանության բոլոր պարագլուխների նկատմամբ...

Հակառակ պարագայում Սերժ և խնամի Հովիկ՝ «պուպուշ», Տիգրան «քըխ» գործելաոճը բացառապես ԲՀԿ-ի գոյության արդարացման հուսահատ ճիգ է...

Վարուժան Բաբաջանյան