«Եվրատեսիլ 2014»-ին Հայաստանը կներկայացնի Արամ MP3-ին

Հայաստանը «Եվրատեսիլ 2014»-ին կներկայացնի Արամ MP3-ին,  այս մասին երեկ Ամանորյան թողարկման ընթացքում հայտնել է Հանրային հեռուստաընկերությունը:

«Եվրատեսիլ - 2014» երգի համաեվրոպական մրցույթը կանցկացվի Կոպենհագենում՝ B&W Hallerne համերգասրահում:

Նշենք, որ 2014-ի մրցույթը կրում է «Join Us» («Միացիր մեզ») խորագիրը:

Այս տարվա մայիսին Շվեդիայի Մալմյո քաղաքում կայացած «Եվրատեսիլ-2013» երգի մրցույթում հաղթող ճանաչվեց Դանիան ներկայացնող Էմմելի դե Ֆորեսթը՝ իր հայրենիք բերելով հաջորդ տարվա շոուի անցկացման իրավունքը:

2014-ի մայիսին կայանալիք համաեվրոպական երգի մրցույթն ուղիղ եթերում հնարավորություն կունենա դիտելու 170 միլիոն մարդ աշխարհի 40 երկրից:

Դանիայի մայրաքաղաքը նախկինում երկու անգամ հյուրընկալել է «Եվրատեսիլ»-ը՝ 1964 և 2001 թվականներին, իսկ 2005-ին այստեղ անցկացվել են մրցույթի 50-ամյակին նվիրված տոնակատարությունները: