Շումախերի բժիշկը՝ մարզիկի վերականգնվելու հավանականության մասին

Ֆրանսիացի քննիչները շարունակում են պարզել գերմանացի ավտոմրցարշավորդ Միխայել Շումախերի հետ տեղի ունեցածի հանգամանքները:

Ֆրանսիայում հարցաքննվել է Շումախերի 14ամյա որդին, ինպես նաև ավտոմրցաշավորդի ընկերը: Նրանք երկուսն էլ Շումախերի հետ եղել են Ալպերում և ականատեսն են եղել այն բանի, թե ինչպես է մարզիկը սահելիս գլուխը հարվածել: Այս մասին գրում է «Ֆրանս-Պրեսս» գործակալությունը՝ հղում անելով հետաքննչական մարմիններին մոտ կանգնած իր աղբյուրին: Դրանից բացի, մասնագետներն ուսումնասիրում են նաև այն տեսախցիկի արձանագրածը, որը եղել է մարզիկի սաղավարտի վրա:

Ինքը Միխայել Շումախերը մի քանի օր է, ինչ գտնվում է Գրենոբլի հիվանդանոցներից մեկում՝ կոմայի մեջ: Այդ հիվանդանոցի Վերակենդանացման բաժանմունքի վարիչը տեղեկացրել է, որ ուղեղի այնպիսի վնասումից հետո, որը Շումախերն է ստացել, վերականգնվում են 45 տոկոսի դեպքում: Ընդ որում՝ բժիշկը ենթադրում է, որ մարզիկը կարող է վերականգնվել, քանի որ արդեն ենթարկվել է երկու վիրահատության:

Հիշեցնենք, որ գերմանացի ավտոմրցարշավորդը գանգուղեղային վնասվածքը ստացել դեկտեմբերի 29-ին: Այժմ նրա վիճակը գնահատվում է ծայրահեղ ծանր:

Իսկ ահա երեկ լրացավ Շումախերի 45-ամյակը: Նրա տասնյակ երկրպագուներ այդ օրը հավաքվել են հիվանդանոցի մոտ՝ ի նշան համերաշխության և հարգանքի: Շումախերի հարազատները շնորհակալություն են հայտնել այդ ակցիայի համար: