«Պարոն նախարար, մեր երեխաներին լավ կնայեք»

Ձմեռային զորակոչը շարունակվում է: Այն առանձնանում է նրանով, որ ծառայության վայրի ընտրությունը տեղի է ունենում վիճակահանությամբ: Զորակոչի ընթացքին տեղում ծանոթանալու համար այսօր հանրապետական հավաքակայան այցելեց պաշտպանության նախարար Սեյրան Օհանյանը։

Նախարարը հետեւեց, թե ինչպես են ծնողների ներկայությամբ երիտասարդները տեղադրված երեք արկղերից վիճակահանության սկզբունքով թերթիկ դուրս քաշում, որի վրա նշված է ապագա ծառայության վայրը, ապա զորամասի համարը ցուցադրում տեսախցիկի առջեւ, որն էլ ամրագրվում էր զինվորական գրքույկում: Արկղերի վրա նշված էր «Ը», «Մ», «Ա» գրությունները. «Ը»-ին մոտենում էին ընդհանուր հիմունքներով ծառայելու կանչված զորակոչիկները, «Մ»-ին' վարորդական մասնագիտացում ստացածները, ինչպես նաև մեխանիկ-վարորդի, կապավորի որակավորում ունեցողները, իսկ «Ա» մակագրությամբ արկղին' համապատասխան արտոնության իրավունք ունեցողները:

Նախարարը զրուցեց զինակոչիկների հետ' հետաքրքրվեց, թե ինչ տրամադրությամբ են մեկնում զինվորական ծառայության, ովքեր ունեն բարձրագույն կրթություն։ Խմբի մեջ բավական շատ էին բարձրագույն կրթություն ունեցողները. «Համապատասխան կրթություն ունեցող զինակոչիկները իրենց ծառայությունը կիրականացնեն այն ստորաբաժանումներում, որտեղ նրանց գիտելիքների կարիքը կա, օրինակ' հակաօդային պաշտպանության, հատուկ նշանակության ստորաբաժանումներում, կամ կծառայեն որպես հրետանավորներ, կապավորներ եւ այլն, կզբաղեցնեն նաեւ կրտսեր հրամանատարական պաշտոններ»,-նշեց պաշտպանության նախարարը:

Նախարար Օհանյանը հաջողություն մաղթեց զինակոչիկներին' ասելով. «Կհանդիպենք ծառայության ընթացքում»:

Այնուհետեւ բժշկական հանձնաժողովի նախագահ, բուժծառայության գնդապետ Գայանե Ղուկասյանը նախարարին զեկուցեց բուժհանձնաժողովի աշխատանքների ընթացքի մասին: Նախարարը մանրամասնորեն հետաքրքրվեց հանդիպող հիվանդությունների, բուժհետազոտության ողջ ընթացակարգի, լրացուցիչ բուժհետազոտության համար հավաքակայանից կատարվող վերադարձների թվի եւ պատճառների մասին, մասնագիտական կաբինետներում ծանոթացավ հետազոտությունների պայմաններին ու ընթացքին: Ծանոթանալով զինակոչիկների անձնական գործերին, նախարարը նկատեց, որ աձնական գործերում առկա բժշկական քարտերում բացակայում են բուժզննման պահին զինվորների ջերմաստիճանի մասին նշումները, նախարարը հրահանգեց լրացնել բացթողումները:

Սեյրան Օհանյանը հանդիպեց որդիներին ճանապարհելու եկած ծնողների հետ եւ նշեց, որ վիճակահանության մեթոդը հնարավորություն է տալիս բացառելու կոռուպցիոն ռիսկերը եւ ապահովում է զորակոչի թափանցիկությունը: Նախարարը բարձրացված բոլոր հարցերին տվեց սպառիչ պատասխաններ: Ծնողներից մեկը արտահայտեց իր մտահոգությունը. «Իմ որդին ունի տեսողության հետ կապված խնդիր, որը, կարծում եմ, պատշաճ ձեւով չի հետազոտվել»: Նախարարը տեղում հանձնարարեց ծնողի ներկայությամբ կատարել զննություն եւ արդյունքները զեկուցել իրեն:

Պաշտպանության նախարարը նշեց, որ հասարակությունից եւ ընտանիքներից ակնկալում են աջակցություն` միջանձնային հարաբերություններում խնդիրները բացառելու համար: Ծնողներն էլ խնդրեցին. «Պարոն նախարար, մեր երեխաներին լավ կնայեք»:

Սեյրան Օհանյանը պատասխանեց լրագրողների հարցերին, անդրադարձավ հրադադարի խախտման դեպքերին եւ ընդգծեց, որ վերջին երկու ամիսներին հայկական կողմը գրեթե բացառել է ցանկացած պատասխան, որպեսզի հակառակորդին էլ հանդարտության կոչ անի. «Բայց փորձը ցույց տվեց, որ նման դեպքում նրանք ավելի են լկտիանում, իսկ լկտիներին պետք է պատժել»:

ՇՈՒՇԱՆ ՍՏԵՓԱՆՅԱՆ

Լուս.` ԱՐԵԳ ՎԱՐԴԱՆՅԱՆԻ

Hayzinvor.am