«Աստծուն կարելի է հայտնաբերել ամենատարբեր եղանակներով». Գարեգին Ա

Ջիովաննի Գուայտա - Բայց ինչո՞ւ Է այդքան դժվար գտնել Աստծուն: Ինչո՞ւ նա իրեն հստակորեն չի դրսևորում: Սուրբ Պողոսը տեսավ մի լույս, լսեց մի ձայն, որը կանչում էր իրեն, դրան հակառակ, շատերը, որ կցանկանային փնտրել Աստծուն, երբեք չեն հանդիպում նրան: Երբեմն այն տպավորությունն է ստեղծվում, թե Ամենազորը կարծես թե վեհերոտ է...

ԳԱՐԵԳԻՆ Ա. ԱՄԵՆԱՅՆ ՀԱՅՈՑ ԿԱԹՈՂԻԿՈՍ - Ես չգիտեմ, թե Աստված ինչու իրեն չի բացահայտում բոլոր մարդկանց, ինչպես Պողոս առաքյալին Է բացահայտել, բայց գիտեմ, որ բոլոր մարդիկ Պողոս առաքյալ չեն... Կարծում եմ, որ մենք չենք կարող հարցնել, թե Աստված ինչու չի անում այս կամ այն բանը. Նրան է մնում իր անսահման սիրով որոշել, թե ինչպես իրեն բացահայտի յուրաքանչյուրին: Բայց Աստված իրեն բացահայտում Է տարբեր ձևերով, արարչագործությունն Աստծու ցայտուն կնիքն է աշխարհում: Շատերն Աստծուն հայտնաբերում են՝ հայելով բույսերին, ուրիշները՝ հետազոտելով սաղմը, որը հետո կդառնա մարդ... Իհարկե, առանձնահատուկ պարագաներ կան, երբ Աստված իրեն որոշ մարդկանց բացահայտում է ավելի ակնհայտորեն, սակայն այստեղ էլ բացահայտման ինչպիսի՜ բազմազան եղանակներ... Աստված նույն կերպ չի հայտնվել Պողոս առաքյալին, Պետրոս առաքյալին կամ Թադեոս առաքյալին: Սուրբ Գրքում ասվում է, որ Մովսեսին նա հայտնվել է Սինայի վրա, իսկ լրությամբ՝ Իր Միածին Որդուն՝ Հիսուս Քրիստոսին, նա շարունակում է իրեն բացահայտել սրբերի կյանքում:
Ինձ համար Աստված ակնհայտորեն իրեն դրսևորում է նրանց մեջ, ովքեր իրենց ամբողջ կյանքը նվիրաբերել են Նրա և մարդկանց ծառայությանը: Ես արդեն խոսել եմ Մայր Թերեզայի մասին: Չեմ կարող այդ անձի մասին մտածել՝ նրա մեջ չտեսնելով Աստծու պատկերը և դրսևորումը:

Երբ նայում ես բնությանը՝ գեղեցիկ ու վսեմ, հաճախ քեզ զգում ես Աստծու ներկայությամբ: Եվ այսպես, Աստծուն կարելի է հայտնաբերել ամենատարբեր եղանակներով, պետք է սոսկ ունկնդիր լինել: Բայց երբեմն մենք կորցնում ենք զգայունակությունը նրա ներկայության նշանների հանդեպ:

Գարեգին Ա Վեհափառի զրույցներից Ջ. Գուայտայի հետ

Աշոտ Վավյանի ֆեյսբուքյան էջից