Էներգաարդյունավետության ծրագրերը քննարկվեցին KfW բանկի ներկայացուցիչների հետ

Հայաստանում շենքերի էներգետիկ արդյունավետության բարձրացմանն ուղղված ծրագրերը քննարկելու նպատակով ՀՀ քաղաքաշինության նախարար Սամվել Թադևոսյանն ընդունեց kfW գերմանական զարգացման բանկի պատվիրակությանը' տարածաշրջանային էներգետիկ ծրագրերի դեպարտամենտի տնօրեն Յան Բլումի գլխավորությամբ:

Ներկայացնելով մեր երկրում շենքերի էներգաարդյունավետության բարձրացմանն ուղղված ծրագրերը, նախարար Ս. Թադևոսյանն ընդգծեց, որ ներկայումս կառավարությունն առաջնահերթ է համարում կրթական օբյեկտնների էներգաարդյունավետության բարձարացումը: Այդ նպատակով արդեն քաղաքաշինության նախարարության ներկայացմամբ ՀՀ կառավարությունը հաստատել է մոտ 300 կրթական օբյեկտների ցանկը, որոնք առաջնահերթ հիմնանորոգման կարիք ունեն: Պարոն Թադևոսյանը նշեց, որ կրթական օբյեկների հիմնանորոգման դեպքում որդեգրվել է համալիր մոտեցման սկզբունքը' սեյսմազինվածության ուժեղացումից մինչև էներգաարդյունավետության բարձրացում: «Ուրախալի է, որ KfW գերմանական բանկի գործակցության մտադրությունը ներկայումս նպատակաուղղվում է նաև մեր երկրում շենքերի էներգաարդյունավետության բարձրացման ծրագրերին»,- նշեց նախարարը:

KfW բանկի պատվիրակության ղեկավար Յան Բլումը տեղեկացրեց, որ ներկայումս KfW բանկում մշակվում է մեր երկրի հետ գործակցության հետագա ուղղությունները և այդ համատեքստում կարևորվում է Հայաստանում էներգետիկ ոլորտի' այդ թվում շենքերի էներգետիկ արդյունավետության բարձրացմանն ուղղված ծրագրերի իրականացումը: KfW բանկի պատվիրակության անդամներն ընդունելի համարեցին կրթական օբյեկտների հիմնանորոգման համալիր մոտեցման սկզբունքը և պատրաստակամություն հայտնեցին ծրագրերի կազմման ժամանակ առաջնորդվել այդ սկզբունքով:

Ծրագրի ուղենիշները մշակելու նպատակով, կողմերը նախնական պայմանավորվածություն ձեռք բերեցին առաջիկայում ուսումնասիրություններ կատարել վերոնշյալ կրթական օբյեկտներից որոշակի մասում: