Զինծառայողի դեպքի առթիվ նշանակվել է ծառայողական քննություն. գործը Ս. Օհանյանի անձնական վերահսկողության տակ է

ՀՀ ՊՆ կենտրոնական կլինիկական զինվորական հոսպիտալ տեղափոխված N զորամասի ժամկետային զինծառայող, նորակոչիկ Մհեր Արմենի Խլղաթյանի դեպքի առթիվ նշանակվել է ծառայողական քննություն: Այս մասին Լուրեր.com-ին հայտնեցին ՊՆ-ից:

Գործը գտնվում է Պաշտպանության նախարար Սեյրան Օհանյանի անձնական վերահսկողության տակ: Նշենք նաև, որ Սեյրան Օհանյանը դեպքից հետո երեկ եղել է նշված զորամասում:

Զինծառայողի առողջական վիճակում կա փոքր-ինչ փոփոխություն դեպի լավը:

Հիշեցնենք, որ Մհեր Արմենի Խլղաթյանը ՀՀ ՊՆ կենտրոնական կլինիկական զինվորական հոսպիտալ է տեղափոխվել երեկ` հունվարի 13-ին, ՀՀ ՊՆ Վարդենիսի զինվորական հոսպիտալից երկկողմանի թոքաբորբ ախտորոշմամբ և մարմնական վնասվածքներով:

Փաստի առթիվ ՀՀ ՊՆ քննչական ծառայությունում հարուցվել է քրեական գործ ՀՀ քր. օր-ի 376 հոդ. 2-րդ (պաշտոնատար անձի անփույթ վերաբերմունքը ծառայության նկատմամբ, որն անզգուշությամբ առաջացրել է ծանր հետևանքներ) և 358.1 հոդ. 2-րդ (զինվորական ծառայության պարտականությունները կատարելու կապակցությամբ ստորադասի նկատմամբ բռնություն գործադրելը) մասերով, նշանակվել է դատաբժշկական փորձաքննություն, կատարվում է նախաքննություն: