Ադրբեջանական լրատվամիջոցները շահարկել են եզդիական գերեզմանատան քանդման մասին լուրերը

Ստորև ներկայացնում ենք «Սինջար եզդիների ազգային միավորում» հկ-ի հաղորդագրութունը.

Օրերս Արմավիրի մարզի Մյասնիկյան համայնքում եզդիական գերեզմանատան հետ տեղի ունեցածը բազմաթիվ շահարկումների առիթ տվեց: Կարելի էր չանդրադառնալ այդ շահարկումներին, եթե չտեսնեինք, թե ինչպիսի ճղճիմ քարոզչական քայլեր են փորձում անել ադրբեջանական լրատվամիջոցները` հիմնվելով այդ շահարկումների վրա:

Անդրադառնալով ադրբեջանական որոշ լրատվամիջոցների շահարկումներին` պետք է արձանագրել, որ այն արդեն իսկ անցել է քարոզչության սահմանը և արդեն զզվելի է դարձել հասարակ մարդու համար: Ուզում ենք մեր հարևանները վերջապես հասկանան, որ Հայաստանի Հանրապետության սահմաններում չկա էթնիկ կամ ազգային խնդիր և եզդիները այստեղ ապրում են այնպես ինչպես կապրեին իրենց տանը: Հակառակ ադրբեջանական փորձերի, հայ և եզդի ժողովուրդների բարեկամությունը ավելի է խորանում և այս գործընթացը շարունակվում է նաև երիտասարդ եզդիների և հայերի շրջանում: Մենք` եզդիներս, Հայաստանի Հանրապետությունում լիարժեք քաղաքացիներ ենք` ի տարբերություն Ադրբեջանում ապրող ազերի կամ թալիշների: Եզդիներին Հայաստանում չեն հետապնդում իրենց ազգային կամ կրոնական պատկանելության համար:

Հայաստանի եզդիաբնակ գյուղերում դասավանդվում է եզդիերեն լեզու և գրականությունը, ինչը գալիս է ապացուցելու, որ մենք ապրելով հայերի պատմական հայրենիքում մեզ օտար չենք զգում: Գոնե ադրբեջանցիները համոզվել են այն բանում, որ հայերն ու եզդիները անբաժան եղբայրներ են` խնդրում ենք հիշեք ղարաբաղյան պատերազմը, որտեղ մենք կանգնած էինք մեր հայ եղբայրների կողքին` պաշտպանելու Հայաստանի սահմանները թշնամու ներխուժումից: Ուզում ենք նաև տեղեկանաք, որ ձեր դեմ պատերազմում մասնակցել են հինգ հարյուր եզդիներ, որոնցից քառասունը ընկել են հերոսի մահով: Հիմա էլ Հայաստանում բնակվող եզդիները, այդ թվում մեր կազմակերպության շատ անդամներ Հայոց բանակի կազմում պաշտպանում են Հայաստանի սահմանները: Իսկ այն խնդիրները, որ կապված են անհատների հետ կլուծվեն Հայաստանի Հանրապետության սահմաններում, ուստի անհարկի են շահարկումները: Մենք կարծում ենք, որ ադրբեջանական լրատվամիջոցների կողմից էթիկ կլինի, եթե նրանք անդրադառնան Նախիջևանի պատմությանը, թե որտեղ է հիմա այդ տարածքի բնիկ ժողովուրդը, թե ինչպես Ադրբեջանի հանրապետության նախաձեռնությամբ ոչնչացվեցին Նախիջևանի հայկական խաչքարերը, թե ինչպես կազմակերպվեց և իրականացվեց Սումգաիթի հայկական ջարդերը, թե ինչպես ոչնչացվեց Մարաղա գյուղը իր բնակչությամբ:

Հ.Գ.Իսկ եթե ադրբեջանական լրատվամիջոցները այդքան հետաքրքրված են եզիների խնդիրներով, ապա կարող են հետաքրքրվել և փորձել հրապարակել, թե որտեղ են հիմա ապրում հազարավոր այն եզդիները ովքեր մինչ 1980 թվականը ապրում էին այդ երկրի տարածքում: