«Հրապարակ». Ալիկ Սարգսյանը պնդում է, որ ինքը առանձնատներ ձեռք չի բերել օվկիանոսից այն կողմ

«Երեկ անդրադարձել էինք նախկին ոստիկանապետ Ալիկ Սարգսյանի ամերիկյան ակտիվ կյանքին: Գրել էինք, որ Սերգեյիչին վերջերս տեսել են Լոս Անջելեսի ռեստորաններից մեկում՝ քեֆ անելիս: Ներկաները հիացմունքով վայելել են Սերգեյիչի համուհոտով երգն ու պարը: Անդրադարձել էինք նաեւ նրա ուրախության առիթին՝ որ Կալիֆորնիայում առանձնատներ է գնել: Ամեն դեպքում, տեղի հայերն այդպես էին պնդում: Այս մասին գրում է «Հրապարակ» օրաթերթը:

Երեկ, սակայն, խմբագրություն էր զանգել Ալիկ Սարգսյանը եւ պնդում էր, որ ոչ ինքը, ոչ իր հարազատներից որեւէ մեկն առանձնատներ ձեռք չի բերել օվկիանոսից այն կողմ, ԱՄՆ մեկնել է անձնական գործով՝ մերձավորներից մեկի առողջության հետ կապված, ապրել է ընկերոջ՝ Օհան Ղարիբյանի հյուրանոցում, որը «3-4 աստղանի սովորական հյուրանոց» է, ոչ մի շքեղություն իրեն թույլ չի տվել, մասնակցել է «Քրիսմըսի» հետ կապված մի խնջույքի, որի ժամանակ լուռ նստել է, չի էլ երգել-պարել: Մինչդեռ մեզ զանգահարած ամերիկաբնակ անձը, որի հետ երեկ մենք կրկին կապվեցինք, պնդում էր, որ անձամբ է տեսել նրա երգն ու պարը, եւ խրախճանքը եղել է Գլենդելի ռեստորաններից մեկում, իսկ Ալիկ Սարգսյանին պատկանող նոր առանձնատունը Բրբենք քաղաքում է»:

Մանրամասն` թերթի այսօրվա համարում