Գյումրիում տարածված վարակը չի կարող ունենալ զանգվածային տարածում. ԱՆ-ն պարզաբանում է

Երեկ ինֆորմացիա տարածվեց այն մասին, որ Գյումրու Գարեգին Նժդեհ 2 հասցեում գտնվող հանրակացարանի բնակիչները շղթայական կերպով միմյանց վարակում են իրենց համար անհայտ հիվանդությամբ: Անգամ 1 տարեկան երեխայի եղունգները վիրուսի պատճառով փտել են, մաշկի վրա առաջացել են թարախաբշտիկներ:

Lurer.com-ի թղթակիցը խնդրի առնչությամբ մեկնաբանություն խնդրեց ՀՀ Առողջապահության նախարարությունից` պարզելու ինչի հետևանք է տարածված վիրուսը և արդյո՞ք այն կարող է լայն տարածում գտնել:

ՀՀ Առողջապահության նախարարության լրատվական բաժնից մեզ տեղեկացրին, որ  նախարարի հանձնարարությամբ' Գյումրու Գարեգին Նժդեհ 2 հասցեում գտնվող հանրակացարանի հիվանդների առողջական վիճակն ուսումնասիրելու նպատակով` Շիրակի մարզ են մեկնել ՀՀ ԱՆ գլխավոր մաշկավեներաբան Կարեն Բաբայանը և ՀՀ ԱՆ գլխավոր ինֆեկցիոնիստ Արա Ասոյանը:

Տեղի մասնագետների հետ կազմակերպվել և իրականացվել է համաճարակաբանական հետազոտություն, որի արդյունքում հաստատվել է մաշկի թարախաբշտիկային հիվանդություն (պիոդերմիա) ախտորոշումը և նշանակվել է բուժում:

Պիոդերմիան (մաշկի թարախաբշտիկային հիվանդություններ) մաշկային հիվանդությունների խումբ է, որոնց հարուցիչները ստաֆիլոկոկերը և ստրեպտոկոկերն են: Հատկապես վտանգավոր են երեխաների մաշկի թարախաբշտիկային հիվանդությունները, որոնց մաշկը և ամբողջ օրգանիզմը զգայուն են ստաֆիլոկոկերի և ստրեպտոկոկերի նկատմամբ: Առողջ մարդկանց մաշկային ծածկույթների վրա գրեթե միշտ կարելի է հայտնաբերել ստաֆիլոկոկերը և ստրեպտոկոկեր: Որոշակի պայմաններում դրանք դառնում են ախտածին' առաջացնելով թարախաբշտիկային հիվանդություններ:

Մաշկի թարախաբշտիկային հիվանդությունների առաջացմանը կարող են նպաստել մի շարք գործոններ, օրինակ' ժամանակին չմշակված քերծվածքները, կտրած վերքերը, մաշկի մշտական կեղտոտումը, օրգանիզմի գերսառեցումը և գերտաքացումը, վիտամինների անբավարարությունը, նյութափոխանակության խանգարումները, հյուծող քրոնիական հիվանդությունները, անձնական հիգիենայի կանոնների խախտումը և այլն: Այս հիվանդությունների խումբը չի կարող ունենալ զանգվածային տարածում և վարակը կարող է առաջանալ վերոհիշյալ գործոնների առկայության պայմաններում:

Հիվանդների առողջական վիճակի հսկողությունը գտնվում է ՀՀ առողջապահության նախարարության ուշադրության ներքո: