Հայաստանում բնակչությունն ուղիղ 3 անգամ ավելի շատ է վճարում գազի դիմաց քան Ռուսաստանում

Գազի և էներգիայի դեկտեմբերյան հաշիվները ստանալուց հետո մարդիկ ձգտում են ավելի շատ օգտագործել Հայաստանի ներքին էներգետիկ ռեսուրսները: Ու քանի որ մենք նավթ ու գազ չունենք, ուստի ներքին էներգառեսուրս ասելով, պետք է հասկանանք փայտը: Այսօր Երևանում, նույնիսկ՝ կենտրոնում, կարել է ավելի հաճախ տեսնել այնպիսի պատկեր, երբ մարդիկ վառելափայտը ինչ-որ տեղերից հայթայթած տանում են տուն:

Հայաստանը Մաքսային միությանն անդամագրելու որոշումը մեր իշխող «նժդեհականները» պատճառաբանում են հիմնականում գազի գնով: Եվ ահա ՄՄ անդամ դառնալու պատրաստակամության դիմաց Ռուսաստանը որոշեց այլևս չբարձրացնել գազի գինը և նաև խոստացավ, որ մոտակա 5 տարում էլ չի բարձրացնի:

«ՀԺ»-ն համեմատել է Մաքսային միության անդամ մյուս երկրներում վաճառվող գազի գները:

Ռուսաստանում բնակչությունը 1000 խմ գազի դիմաց վճարում է 126 դոլար: Բելառուսում այդ ցուցանիշը 84 դոլար է, Ղազախստանում՝ 69 դոլար: Իսկ Հայաստանում 380 դոլար է: Փաստորեն ստացվում է, որ Հայաստանում բնակչությունն ուղիղ 3 անգամ ավելի շատ է վճարում գազի դիմաց քան Ռուսաստանում, 4.5 անգամ ավելի շատ քան Բելառուսում, և 5.5 անգամ ավելի շատ քան Ղազախստանում:

Այսինքն, եթե դուք գնացել եք գազի հաշիվը վճարելու և պարզել եք, որ վճարելու եք, ասենք 60 հազար դրամ, ապա Ռուսաստանի ներքին գներով վերահաշվարկելու դեպքում դա կլիներ 20 հազար դրամ, Բելառուսի ներքին գներով՝ 13 հազար դրամ, իսկ Ղազախստանի ներքին գներով՝ 11 հազար դրամ:

Բնակչության գազամատակարարման սկզբունքները բոլորովին չեն տարբերվում, օրինակ, ռուսական սկզբունքներից՝ գազն ինքն իրենից գնում է «Գազպրոմը», իր իսկ խողովակներով հասցնում տարածաշրջան ու վաճառում բաժանորդներին: Տարբերությունը միայն այն է, որ Ռուսաստանում դա անում է հենց «Գազպրոմը», Հայաստանում՝ «Գազպրոմի» բացարձակ սեփականությունը հանդիսացող «Հայռուսգազարդը»: Ռուսաստանի գազային խոշորագույն հանքավայրերից՝ օրինակ Ուրենգոյից կամ Յամբուրգից գազը Հայաստան հասցնելու ինքնարժեքն ընդամենը 10-15 տոկոսով է բարձր քան այդ նույն գազը, ասենք, Պսկով կամ Կրասնոդար հասցնելը: Դրա արդյունքում բուն գազի գինը կարող է փոփոխվել ընդամենը 1-2 տոկոսով:

Վրաստանի տարածքով ռուսական գազի տարանցման արդյունքում գազը թանկանում է ընդամենը 10 տոկոսով, ոչ ավելին: Այլ կերպ ասած՝ բոլոր հաշվարկները ցույց կտան, որ Մաքսային միության անդամ, այսինքն միևնույն տարածքի մաս կազմող Հայաստանի բնակչությանը վաճառվող գազի օբյեկտիվ գինը չի կարող գերազանցել 140-150 դոլարը, իսկ հիմա մենք վճարում ենք 380 դոլար: Ի՞նչ է. մենք ՄՄ-ի խորթ տղերքն ենք, մեզ փայ չկա՞ ՄՄ-ից:

Մանրամասները՝ թերթի այսօրվա համարում: