Աշխարհահռչակ հայ լուսանկարիչ Արա Գյուլերը վերակենդանացման բաժանմունքում է

Թուրքական Hurriyet-ի փոխանցմամբ՝ «Դարի լավագույն լուսանկարիչ» ճանաչված ստամբուլահայ Արա Գյուլերին երիկամային անբավարարության պատճառով շտապ տեղափոխել են հիվանդանոց: Նրա վիճակը շատ ծանր է եղել, այդ պատճառով Գյուլերին բուժման են վերցրել վերակենդանացման բաժանմունքում:

Արա Գյուլերը ծնվել է 1928 թ. օգոստոսի 16-ին, Ստամբուլում: Դպրոցական տարիներին աշխատել է Թուրքիայի կինոստուդիաներում և հաճախել թատերական դասընթացների:

Նա 800 հազար լուսանկարների հեղինակ է, եղել է «Ենի Իստամբուլ», «Թայմ լայֆ», «Փարիզ մատչ», «Ստեռն», թերթերի, «Մագնում» գործակալության ֆոտոլրագրող, «Հայաթ» ամսագրի լուսանկարչական բաժնի ղեկավար: Միացյալ Թագավորությունում հրատարակված «Լուսանկարչության բրիտանական ամսագիր» տարեգրքում ճանաչվել է աշխարհի 7 լավագույն լուսանկարիչներից մեկը:

1970-ականներին ֆոտոհարցազրույցներ է վերցրել այնպիսի հեղինակավոր դեմքերից, ինչպիսիք են Ուինսթոն Չերչիլը, Մարիա Կալլասը, Ջոն Բերգերը, Բերնարդ Ռասսելը, Սալվադոր Դալին, Պաբլո Պիկասոն, Ինդիրա Գանդին և այլք: 1975 թ. նկարահանել է «Հերոսի վերջը» վավերագրական ֆիլմը: Համարվում է Թուրքիայում ֆոտոնկարչության հիմնադիրը: Ստացել է «Ստամբուլի աչք» կամ «Ստամբուլի լուսանկարիչ» մականունը: