Սենատորներն իրենց դժգոհությունն են հայտնել «Մագնիտսկու ցուցակում» նոր անուններ չգտնելու համար

ԱՄՆ-ում մի խումբ հեղինակավոր օրենսդիրներ հանդես են եկել հայտարարությամբ,  ըստ որի` պետք է ընդլայնվի «Մագնիտսկու ցուցակը», ինչպես նաև համոզել այլ երկրների՝ սեփական պատժամիջոցները սահմանելու ցուցակում հայտնված անձանց նկատմամբ: Այս մասին հայտնել է itar-tass-ը:

Սենատորներ Ռոբերտ Մենենդեսը, Բոբ Քորքերը, Բեն Կարդինը և Ջոն Մաքքեյնն իրենց զեկույցում պահանջել են ԱՄՆ նախագահ Բարաք Oբամային ներկայացնել Պետդեպարտամենտի տարեկան հաշվետվությունը:

Հաշվետվության ուսումնասիրությունների արդյունքում պարզվել է, որ 2013-ի ապրիլից «Մագնիտսկու ցուցակում» ոչ մի նոր անուն չի ավելացել, ինչը մտահոգել է սենատորներին:

«Մենք ակնկալում ենք, որ դուք կարձագանքեք մեր խնդրանքին և հույս ունենք, որ կքննարկեք «Մագնիտսկու օրենքի» գործողությունը, որը պետք է տարածվի բոլոր երկրների վրա: Այս օրինագծով մենք կհասնենք նրան, որ բոլոր այն անձինք, ովքեր ամերիկյան Կոնգրեսի կարծիքով` կխախտեն մարդու իրավունքները, կներառվեն ԱՄՆ պատժամիջոցների գլոբալ ցուցակ»,-ասվում է սենատորների` ԱՄՆ նախագահին ուղղված զեկույցում:

Պետդեպարտամենտը նաև ոչինչ չի նշել այն միջոցառումների մասին, որոնք ուղղված կլինեն ցուցակում հայտնված անձանց նկատմամբ` այլ երկրների կողմից սեփական պատժամիջոցները սահմանելուն: