Ամբողջ ժողովրդին ոտքի ենք հանելու` երկիրը թալանից փրկելու համար. Լևոն Զուրաբյան

Ազատության հրապարակում շարունակվում է Ազգային ժողովի ոչ իշխանական 4  խմբակցությունների նախաձեռնած ակցիան` ընդդեմ պարտադիր կուտակային կենսաթոշակների: Հայ ազգային կոնգրեսի փոխնախագահ Լևոն Զուրաբյանն ասաց, որ Հայ ազգային կոնգրեսը ողջունում է Ազուտության հրապարակում գտնվող ժողովրդին: Զուրաբյանի խոսքով` անկախ, ինքնիշխան հանրապետությունը սկսում է հենց Ազատության հրապարակից. «Այս շարժումը ձևավորվել է շատ պարզ նպատակի շուրջ` քաղաքացու իրավունքով մերժել իշխանության ընդունած օրենքը»,-ասաց Զուրաբյանը` հավելելով, որ այս շարժումն արթնացրեց ակտիվություն այս հարցի շուրջ, նպաստեց ԱԺ-ում 4 խմբակցությունների միասնականության  ամրապնդմանը:

Լևոն Զուրաբյանը վստահություն հայտնեց, որ կգա ժամանակ, որ ամբողջ ժողովուրդը ոտքի կկանգնի. «Գալու է այս իշխանության` ժողովրդին հաշիվ տալու ժամանակը, ամբողջ ժողովրդին ոտքի ենք հանելու` երկիրը թալանից փրկելու համար»,-եզրափակեց Լևոն Զուրաբյանը: 

Հիշեցնենք, որ ավելի վաղ տեղեկացրել էինք, որ Ազատության հրապարակում տեղի է ունենում բողոքի ակցիա` ընդդեմ պարտադիր կուտակային կենսաթոշակների: Ազգային ժողովի ոչ իշխանական 4 խմբակցության ներկայացուցիչներին միացել են նաև «STOP» և «Դեմ եմ» նախաձեռնության անդամները: