Մրցաշրջանի երկրորդ հատվածն ավելի լավ է լինելու. Հենրիխ Մխիթարյան

Հայաստանի ազգային հավաքականի և Դորտմունդի «Բորուսիայի» կիսապաշտպան Հենրիխ Մխիթարյանը Ruhrnachrichten-ին տված հարցազրույցում նշել է.

-Երեքշաբթի կդառնաք 25 տարեկան: Ի՞նչ եք մաղթում  ինքներդ ձեզ:

- Բացի ինձ և իմ ընտանիքին առողջություն մաղթելուց, իմ ամենամեծ ցանկությունը «Բորուսիայի» կազմում իրական խաղս ցույց տալն է:

-Ձեր նախկին մարզիչ Միրչա Լուչեսկուն մի անգամ Ձեզ անվանել էր «ոտքից գլուխ պրոֆեսիոնալ»: Ճի՞շտ է, արդյոք, որ Դոնեցկում Ձեզ կոչում էին  «մարզաբազայի տնօրեն էր»:

- Այո, դա այդպես է (ծիծաղում է): Դոնեցկում մարզաբազայում էի ապրում և ամբողջովին կենտրոնացած էի ֆուտբոլի վրա: Այդ ժամանակ երազանք ունեի, որը անպայման ցանկանում էի իրականացնել: Միշտ դաշտը վերջինն էի լքում, իսկապես ապրում էի ֆուտբոլով: 

- Կլոպը հաճախ է ասում, որ դուք պետք է ավելի կայուն խաղաք և ինքներդ ձեզ վրա այդքան շատ ճնշում չգործադրեք: Նրա հետ ինչպիսի՞ հարաբերություններ ունեք: Նա Ձեզ հետ շա՞տ է զրուցում:

- Կլոպը շատ է զրուցում ինձ հետ: Վերջին անգամ բավականին երկար զրուցել ենք  4 օր առաջ՝  հավաքի ժամանակ: Նա ինձ ասաց, որ ես պետք է ազատվեմ ինքս ինձ վրա ճնշում գործադրելուց. լինի դա մարզում, խաղից հետո, թե խաղի ժամանակ: Չպետք է գլուխս ավելորդ մտքերով ծանրաբեռնեմ, պետք է ազատ լինեմ  դրանցից:

- Նման դեպքում, Ձեզ համար ի՞նչ դեր է խաղում «Բորուսիայի» վճարած տրանսֆերային գումարը:

- Իհարկե տրանսֆերային արժեքը պատճառներից մեկն է, բայց ես պետք է այդ մասին մտքերը թողնեմ անցյալում  և մոռանամ: Ժամանակն է ցուցադրել խաղային որակներս: Մրցաշրջանի երկրորդ հատվածն ավելի լավ կլինի:

- Ամռանը Լևանդովսկին լքում է ակումբը, Գյունդողանի ապագան դեռ պարզ չէ: Զգուշանո՞ւմ եք արդյոք, որ թիմն ապագայում կթուլանա:

- Ոչ: Մենք հետո էլ պետք է ուժեղ լինենք, քանի որ Հանս Յոահիմ Վացկեն, Միխայել Ցորկը և Յուրգեն Կլոպը ամեն ինչ կանեն, որ  ամռանը  հիանալի թիմ ունենանք: Որպես միասնական թիմ՝ կշարունակենք առաջընթաց ապրել: