«Միայն թե մայրս չիմանա». Հովհաննես Բադալյան (տեսանյութ)

Ժողովրդական երգիչ Հովհաննես Բադալյանը ծնվել է 1924 թ., դեկտեմբերի 15 –ին է Իրանի Համադան քաղաքի մոտ գտնվող Շավարին գյուղում:
Սովորել է Ռ. Մելիքյանի անվան երաժշտական ուսումնարանում (1946-49), ավարտել Երևանի կոնսերվատորիան (1986)։ 1949-54-ին նա եղել է Հայաստանի երգի-պարի պետական, իսկ 1954-2001 թվականներին' ՀՀ հեռուստառադիոպետկոմի ժողգործիքների անսամբլների մեներգիչ։ 1982-2001-ին դասավանդել է Երևանի կոնսերվատորիայում։ Հյուրախաղերով հանդես է եկել արտասահմանում։ Վախճանվել է Երևանում 2001 թ. օգոստոսի 19-ին:
Հովհաննես Բադալյանի երգացանկում էին հայ դասական և ժամանակակից հեղինակների (Խ. Ավետիսյանի «Որտեղ գտնեմ քեզ», «Երբ կանչում ես ինձ», Ա. Սաթյանի «Ես իմ անուշ Հայաստանի», Ն. Գալանդերյանի «Դու նորից եկել ես», «Ափսոսանք»), ժողովրդական («Հորովել», «Խանիման-ջանիման», «Սարերի հովին մեռնեմ»), աշուղական (Ջիվանու «Ազգ իմ») երգեր, որոնց կատարումներն աչքի են ընկնում քնարականությամբ, մեղեդային նուրբ ելևէջներով։
Ձեզ ենք ներկայացնում նրա «Միայն թե մայրս չիմանա» երգի բառերը և տեսանյութը:

Իմ այրող վշտից սիրտս է մաշվել,
Կյանքս է մաշվել, էլ ի՞նչս մնաց.
Լամ ու արցունքս աղի-ծով դառնա,-
Միայն թե մայրս վիշտս չիմանա:

Ա ՜խ, գլուխս առնիմ, ընկնիմ սարերը,
Զարկե՜մ  քարե-քար, զարկեմ քարե-քար.
Սիրտս գայլերին թող բաժին դառնա,
Միայն թե մայրս մահս չիմանա: