Արմեն Հովհաննիսյանի լուսանկարն ու «Պատիվ ունեմ» երգը՝ ադրբեջանական կայքերում. հայ հաքերները կոտրել են ադրբեջանական կայքեր

Հայ հաքերները կոտրել են ադրբեջանական մոտ 30 կայքեր: Հաքերները ադրբեջանական կայքերում տեղադրել են սերժանտ Արմեն Հովհաննիսյանի լուսանկարը, և հայրենասիրական երգեր, այդ թվում Դավիթ Ամալյանի «Պատիվ ունեմ» երգը:

Հիշեցնենք, որ ինչպես ավելի վաղ հայտնել էր Լուրեր.com-ը, հունվարի 19-ի լույս 20-ի գիշերը ժամը 23:50-ից մինչև 00:15-ի սահմաններում ղարաբաղա-ադրբեջանական հակամարտ զորքերի շփման գծի հյուսիսարևելյան (Ջրաբերդ) և հարավարևելյան (Կորգան) ուղղություններում արձանագրվել են հակառակորդի դիվերսիոն խմբերի ներթափանցման միաժամանակյա փորձեր: ԼՂՀ զինված ուժերի առաջապահ ստորաբաժանումները հավաստանշելով ադրբեջանական դիվերսիոն խմբերի գործողությունները, երկու ուղղություններում էլ անցել են կազմակերպված պաշտպանության և հակառակորդին պատճառելով զգալի մարդկային և նյութական կորուստ՝ հետ շպրտել իր ելման դիրքերը: Բռնկված փոխհրաձգության արդյունքում հակառակորդի կողմից ստացած հրազենային վիրավորումից՝ հյուսիսարևելյան ուղղությամբ տեղակայված մարտական դիրքում իր առջև դրված խնդիրը արիաբար կատարելու ժամանակ զոհվել է կրտսեր սերժանտ Արմեն Լևոնի Հովհաննիսյանը:

ԼՂՀ նախագահ Բակո Սահակյանը հունվարի 20-ին ստորագրել է հրամանագիր, համաձայն որի՝ ԼՂՀ պետական սահմանը պաշտպանելիս ցուցաբերած արիության համար ԼՂՀ պաշտպանության բանակի N զորամասի կրտսեր սերժանտ Արմեն Հովհաննիսյանը հետմահու պարգևատրվել է «Արիության համար» մեդալով։

Նշենք, որ Արմենը մի քանի րոպե շարունակ միայնակ կռվել է թշնամու դեմ և փրկել մոտ տաս հոգու կյանք:

Նշենք նաև, որ մի քանի օր առաջ արդրբեջանցի հաքերները կոտրել էին 30-ից ավելի հայկական կայքեր: