Գիտության պետական կոմիտեն 2014 թ.-ին կհայտարարի նաև ասպիրանտների աջակցության նոր մրցույթ

Հասարակություն 23 Հունվար, 2014 3:26

ՀՀ ԿԳՆ գիտության պետական կոմիտեն 2013թ.-ին հանդես է եկել կարևոր օրենսդրական նախաձեռնությամբ. ԱԺ է ներկայացրել «Գիտական և գիտատեխնիկական փորձաքննության մասին» ՀՀ օրենքի նախագիծը, որն առաջին ընթերցմամբ ընդունվել է:

Այս մասին ՀՀ կառավարության մամուլի կենտրոնում կայացած մամուլի ասուլիսում նշել է ՀՀ ԿԳՆ գիտության պետական կոմիտեի նախագահ Սամվել Հարությունյանը: Ըստ նրա' այդ օրենքը կնպաստի միջազգային մակարդակին համապատասխան նախագծերի ընտրությանն ու արդյունավետ իրականացմանը և գիտության ոլորտի ֆինանսավորման արդյունավետության բարձրացմանը:
«Մենք այս օրենքին վաղուց էինք սպասում և հույս ունենք, որ այն 2014թ.-ին կընդունվի»,-ասել է Ս.Հարությունյանը, հավելելով, որ ՀՀ կառավարություն է ներկայացվել նաև «Գիտական և գիտատեխնիկական գործունեության մասին»
ՀՀ օրենքի նախագիծն ու «Գիտության ոլորտ երիտասարդ կադրերի ներգրավման ծրագիրը»:

Գիտության պետական կոմիտեի նախագահը տեղեկացրել է, որ անցած տարի հայտարարվել և կազմակերպվել է Գիտական և գիտատեխնիկական գործունեության պայմանագրային (թեմատիկ) ֆինանսավորման 11 մրցույթ:
Ըստ Ս.Հարությունյանի' մրցույթների կազմակերպման գործընթացում կատարվել են մի շարք բարեփոխումներ: Մասնավորապես, բարձր արդյունավետությամբ աշխատող 97 գիտաշխատողներ մեկ տարի ստանալու են ամսական կտրվածքով 135000 դրամ: Գիտության ոլորտում ենթակառուցվածքի, նյութատեխնիկական բազայի արդիականացման, գիտական սարքերի և սարքավորումների ձեռքբերման համար տրամադրվել է 305 մլն 570 հազ. դրամ:

Անդրադառնալով 2014 թ.-ի գերակայություններին' Ս.Հարությունյանի նշել է, որ նախատեսված են մի շարք միջոցառումներ «Քենդլ» նախագծի հետ կապված ,այդ թվում հողհատկացման վերաբերյալ ՀՀ կառավարության որոշման ընդունում:

2014 թ.-ին Գիտության պետական կոմիտեն կհայտարարի նոր մրցույթներ' ասպիրանտների աջակցության, գիտական սարքեր և սարքավորումներ ձեռք բերելու հետ կապված: