Հազար ափսոս քո նահատակ հերոս կյանքի համար. Ուկրաինայի նախկին դեսպանը` Կիևում զոհված Սերգեյ Նիգոյանի մասին

Մինչև երեկ հայ հանրությունն ընդհանուր առմամբ անհաղորդ ու անտարբեր էր Ուկրաինայի մայրաքաղաքում` Եվրամայդանում տեղի ունեցող իրադարձություններին: Սակայն, երեկ այնտեղ տեղի ունեցած ողբերգությունը պատճառ դարձավ, որ Եվրամայդանն այսուհետ լինի մեզ հարազատ: Կիևում ցուցարարների և ոստիկանության` արդեն ամիսներ շարունակվող հակամարտության առաջին զոհը դարձավ ազգությամբ հայ, 20-ամյա Սերգեյ Նիգոյանը, ով Եվրամայդանի ակտիվ մասնակիցներից էր: Ընդ որում, այդ երիտասարդը Եվրամայդանում կանգնած է եղել մեր եռագույնով: Նիգոյանը, ում ընտանիքը 90-ական թվականներին է Հայաստանից Ուկրաինա տեղափոխվել, սպանվել է երեկ վաղ առավոտյան, Կիևի «Դինամո» մարզադաշտի մերձակայքում: Ուկրաինական newsru.ua կայքը, վկայակոչելով ոստիկաններին, պնդում է, որ Նիգոյանը զոհվել է դիպուկահարի կրակոցից:

Հայաստանում Ուկրաինայի նախկին դեսպան Ալեքսանդր Բոժկոն իր ֆեյսբուքյան էջում բավական հուզիչ և անկեղծ գրառում է արել.

«Հազար ափսոս քո նահատակ հերոս կյանքի համար, սիրելի Սերգեյ: Նամարդ գնդակն ընտրում է լավագույններին՝ թե՛ Ղարաբաղի լեռներում, թե՛ Կիևի փողոցներում: Ներիր, Սերգեյ ջան, իմ մեղսավոր Ուկրաինային, նա դեռևս չի կայացել որպես մարդասեր պետություն, դրա համար էլ չկարողացավ պահպանել քեզ: Հենց հանուն մարդասիրության այդ մակարդակի թափվեց քո հերոսական արյունը, իր մարդկային դեմքն աշխարհի առաջ պարզերես կանգնելու համար է շարունակվում արդեն հարյուրամյակներ տևող ուկրաինական պայքարը: Հավերժ փառք քեզ և հավերժ փառք քեզ հետ նահատակվածներին»:

Իսկ ուկրաինական հայտնի «ԿՍպՈվ ժսՖջՌ» խմբի մեներգիչ Սվյատոսլավ Վակարչուկը, Twitter-ի իր էջում անդրադառնալով հայ երիտասարդի սպանությանը, գրել է. «Ժամանակին հայ Փարաջանովը ֆիլմ նկարահանեց, որը դարձավ ուկրաինացիների խորհրդանիշը: Այսօր հայ Նիգոյանը զոհաբերեց իր կյանքը, որը դարձավ Ուկրաինայի խորհրդանիշը»:

Եվրամայդանում երկու ամիս շարունակվող զանգվածային խաղաղ բողոքի ակցիաները, որ վերջին օրերին վերածվել էին ցուցարարների եւ իրավապահների միջև մարտական գործողությունների, երեկ ողջ աշխարհի ուշադրության կենտրոնում էին հայտնվել: Խոսվում էր երեք զոհերի մասին: Հատուկջոկատայիններն օրվա ընթացքում մի քանի անգամ գրոհել են ցուցարարների կառուցած բարիկադները' փորձելով դուրս մղել նրանց այնտեղից, սակայն, ապարդյուն:

Ուկրաինական ընդդիմության փաստացի առաջնորդներից Վիտալի Կլիչկոն Ուկրաինայի նախագահ Վիկտոր Յանուկովիչի հետ հանդիպումից անմիջապես հետո ցուցարարներին կոչ է արել ոչ մի դեպքում թույլ չտալ, որ հատուկջոկատայիններն իրենց դուրս մղեն Մայդանից:

Մանրամասները` թերթի այսօրվա համարում: