Կուտակայինի «կնքահայր» վարչապետի մտերիմ Արարատ Զուրաբյանը` «Պարտադիր կուտակայինի» դեմ պայքարի մասին

Կուտակային կենսաթոշակի մասին օրենքին թեև դեմ են Հայաստանի ողջ ժողովուրդն ու քաղաքական ուժերը, սակայն ակտիվ մասնակցություն, համախմբվածություն կոնկրետ խնդրի շուրջ չկա: Շատերը համարում են, որ դա լուծում չէ, և պետք է համախմբվել համակարգային փոփոխության նպատակի շուրջ: Շատերն իրենց գրասենյակներից են հետևում այս պայքարին, քչերը՝ Ազատության հրապարակում պարզապես ներկա գտնվելով: Շաբաթ օրը Ազատության հրապարակ այցելածների թվում էր վերածնված Հայոց համազգային շարժման ղեկավար Արարատ Զուրաբյանը:

Ի դեպ, կուտակայինի «կնքահայր» վարչապետն Արարատ Զուրաբյանի մտերիմներից է:

Ստորև Ձեզ ենք ներկայացնում Արարատ Զուրաբյանի հետ, «Հրապարակ»-ի հարցազրույցից մի հատված.

- Պարոն Զուրաբյան, ՀՀՇ-ի վերստեղծումն ավելի շռնդալից էր, քան գործունեությունը: Ի՞նչն է Ձեզ խանգարում ակտիվ լինել:

- Ի տաբերություն շատերի, մենք Հայաստանում շատ ենք տեսել, որ մարդիկ շատ բարձր ձայն են հանում, բայց այդ ձայնը դատարկ տեղից է գալիս: Մենք սկսել ենք մեր գործունեությունը, կարծում եմ՝ կարճ ժամանակ հետո կուսակցությունը կսկսի լիարժեք գործել:

- Ինչ-որ կարևոր բանի՞ եք սպասում կամ գուցե խնդիրնե՞ր ունեք…

- Ոչ մի կարևոր բանի չենք սպասում, խնդիր չունենք, ամեն ինչ նորմալ է, հիմա կուսակցության շինարարությամբ ենք զբաղվում: Հավաքում ենք մեր մարդկանց, սկսում ենք շրջաններում ձևավորել մեր բջիջները: Մի խոսքով, աշխատանք անում ենք, կարծում եմ` շտապելու բան չկա: Եթե ինչ-որ պրոցեսներ լինեն, մենք մեր մասնակցությունը կունենանք:

- Պրոցեսներ չկա՞ն: Այս պահին մարդիկ կուտակային կենսաթոշակային համակարգի դեմ բողոքի ակցիաներ, հանրահավաքներ են անում, էլ չասած ներքին ու արտաքին քաղաքական խնդիրները: Դրանք բավարար չե՞ն:

- Ինչպես տեսնում եք` հրապարակում մասնակցում եմ այս հանրահավաքին:

- Ինչո՞ւ հարթակում չեք, ձեր կուսակցությունն այդ խնդրի վերաբերյալ ասելիք չունի՞:

- Ասելիք շատ ունենք, կարող ենք առաջարկություններ անել: Գիտեք ինչ, ցանկացած պրոցես կազմակերպում են մարդիկ, կազմակերպություններ, հիմա, փառք աստծո, գտնվել են մարդիկ, որոնք որ կենսաթոշակայինի հետ կապված ակցիա են կազմակերպել, ես գտնում եմ, որ առողջ մտածելակերպ ունեցող մարդիկ պետք է մասնակից լինեն գործընթացին: Նրանք են կազմակերպել, մենք էլ, որպես քաղաքացիներ, մասնակից պիտի լինենք: Ինչ վերաբերում է պրոցեսներին, կարծում եմ, որ առջևում է, բոլորի գործողություններն էլ երևալու են, այդ թվում՝ մերը:

Մանրամասները` թերթի այսօրվա համարում: