Հայրենի կառավարությունը սովորողների տարկետման իրավունքը վերացնում է` արտագաղթի դեմ պայքարի շրջանակներում

«Ժողովուրդ»-ն այսօրվա խմբագրականում գրում է.

«ՀՀ կառավարությունն այսօրվա նիստում քննարկելու է բարձրագույն ուսումնական հաստատություններում սովորողների տարկետման իրավունքը վերացնելու հարցը: Կրթության և գիտության նախարարության կողմից առաջարկվելու է փոփոխություններ կատարել «Զինապարտության մասին» ՀՀ օրենքի 14-րդ հոդվածում` սահմանելով, որ պետական պատվերով, միջպետական և միջգերատեսչական համաձայնագրերով օտարերկրյա պետությունների բարձրագույն ուսումնական հաստատությունների ուսանողներին, օրդինատուրայում, ինտերնատուրայում, մագիստրատուրայում կամ ասպիրանտուրայում սովորողներին այսուհետ տարեկետում կտրվի միայն ՀՀ կառավարության սահմանած դեպքերում և կարգով:

Ինչով է պայմանավորված գործող կարգը փոփոխելու անհրաժեշտությունը: Պարզվում է` հայրենի կառավարությունը դա անում է արտագաղթի դեմ պայքարի շրջանակներում. «Վերջին ժամանակներում ՀՀ-ում միջպետական և միջգերատեսչական համաձայնագրերի շրջանակներում սովորելու ցանկություն հայտնողների գերակշիռ մասը արական սեռի քաղաքացիներ են: Երևույթի շարժառիթը հիմնականում պարտադիր զինվորական ծառայությունից խուսափելու հնարավորությունն է, որն էլ իր հերթին խթանում է բնակչության արտագաղթը, ինչպես նաև հայրենիք չվերադառնալու հիմքեր է առաջացնում»,- ասված է որոշման նախագծի հիմնավորման մեջ:

Իրականում, սակայն, ակնհայտ է, որ այս փոփոխության առաջնային շարժառիթը ՀՀ զինված ուժերը համապատասխան թվով զինակոչիկներով համալրելու անհրաժեշտությունն է, որը հատկապես սրվել է վերջին տարիներին` կապված արտագաղթի աղետալի տեմպերի և ծնելիության անկման հետ: Եվ որքան էլ խուսափենք այս հարցում ճշմարտությունը բարձրաձայնելուց` մեր թշնամիների ջրաղացին ջուր չլցնելու` իշխանությունների սիրելի պատճառաբանությամբ, այդուհանդերձ վիճակն արդեն այնպիսին է, որ դրա մասին չխոսելու տարբերակ այլևս չկա:

Այն աստիճան, որ այդ մասին նշված է նաև նախագծում. «Զորակոչիկների սահմանափակ ռեսուրսների առկայության պայմաններում նախագծի ընդունումը որոշ չափով կնպաստի զորակոչի կազմակերպման արդյունավետության բարձրացմանը»:

Եթե արդեն երկրի «գիտելիքահեն տնտեսության» տեսլական ունեցող կառավարությունն է փորձում լրացուցիչ սահմանափակումների ներմուծմամբ խոչընդոտել երիտասարդների` արտերկրում անարգել գիտելիքներ ձեռք բերելու, ապա միայն բանակում ծառայելու հնարավորությունը, ապա վիճակը շատ ավելի տխուր է, քան պատկերացնում ենք:

Ընդ որում, նկատենք, որ ՀՀ զինված ուժերի համալրման խնդիրն այլևս պայմանավորված չէ 90-ականներին զինվորական ծառայությունից խուափողների թվով: Նրանք արդեն անցել են սահմանված տարիքային շեմը, և ներկայիս «դեֆիցիտը» պայմանավորված է բացառապես ՀՀ բնակչության աննախադեպ նվազմամբ»: