Տրանսպորտին կանգառներում ստիպված են լինում 30 րոպեից ավելի սպասել

«Ժողովուրդ»-ին ահազանգած մի քանի տասնյակ քաղաքացիներ դժգոհեցին, որ 7 համարի հասարակական տրանսպորտին կանգառներում ստիպված են լինում 30 րոպեից ավելի սպասել:

«Անմիջապես գնացինք N7 համարի ավտոբուսների հավաքատեղի, որտեղ վարորդներից մի քանիսը մեզ հայտնեցին, որ հատկապես վերջին մի քանի օրերին վարորդների մեծ մասը «ավտոբուսի բանալիները շպրտել է ու հրաժարվել վարել»: Նրանց խոսքով՝ պատճառն աշխատանքային սարսափելի պայմաններն են»,- գրում է «Ժողովուրդ»-ը:

Երևանի քաղաքապետարանի տրանսպորտի վարչության պետ Հենրիկ Նավասարդյանը թերթի հետ զրույցում հակառակն էր համոզում.

«Քաղաքացին չի կարող 30 րոպե սպասել կանգառում: 7 համարի համար նախատեսված է ընդամենը 10 ավտոբուս, որից 8-ը հունվարի 21-ի տվյալներով աշխատել է: Իսկ մյուս երկուսի մասով ոչինչ չեմ կարող ասել. գուցե վարորդն է հիվանդ եղել կամ մեքենան՝ անսարք: Իսկ այն, որ դադարեցված է, և չեն աշխատում, նման բան չկա»:

Տրանսպորտի վարչության պետի այս խոսքերից հետո թերթի թղթակիցը 7 համարի ավտոբուսին սպասել է 42 րոպե:

Մանրամասները` թերթի այսօրվա համարում: