ԲՀԿ օրակարգում իշխանափոխության հարց չկա. ԲՀԿ-ական գործարար պատգամավոր

Պարտադիր կենսաթոշակային կուտակային համակարգի դեմ ոչ իշխանական խորհրդարանական չորս ուժերի շաբաթօրյա հանրահավաքը, որոշ տեղեկություններով, ընդվզման ալիք է բարձրացրել նաև ԲՀԿ-ում:

«Հրապարակ»-ը զրուցել է ԲՀԿ-ական գործարար պատգամավորներից Արագած Ախոյանի հետ, ով զբաղվում է էլիտար շենքերի շինարարությամբ և «Հայկ Արշին» շինարարական ընկերության սեփականատերն է.

- Պարոն Ախոյան, Դուք մասնակցե՞լ եք շաբաթ օրը տեղի ունեցած հանրահավաքին:

- Ոչ, որովհետև ես Անկարայում էի, Հրանտ Դինքի սպանության տարելիցին նվիրված ֆորումին էի մասնակցում, ելույթ եմ ունեցել շատ լավ: Վերադարձել եմ երկուշաբթի և չէի կարող մասնակցել:

- Եթե Հայաստանում լինեիք, կմասնակցեի՞ք հանրահավաքին:

- Դե, եթե նպատակահարմար գտնեի, կմասնակցեի:

- Ինչպե՞ս եք ընդունում չորս ուժերի համագործակցության փաստը:

- Ես մի բան կարող եմ ասել, չէ՞ որ մենք որդեգրել ենք այնպիսի քաղաքականություն, որը պետք է ժողովրդի շահերից ելնելով իրականացնենք:

Եթե նման համագործակցությունը բխում է ժողովրդի շահերից, ես նորմալ եմ վերաբերվում: Մենք գիտենք, որ կուտակային կենսաթոշակային համակարգը համահունչ չէ այսօրվա գոյություն ունեցող մեր տնտեսական վիճակին և, բնականաբար, բերելու է չորս ուժերի համալիր ծրագիր:

- Բայց այդ հանրահավաքի օրը միայն կուտակային կենսաթոշակային համակարգի մասին չխոսվեց, ելույթներ եղան նաև իշխանափոխության պահանջով:

- Ես չեմ կարող ասել, որովհետև տեղյակ չեմ, չեմ լսել, ինչպես ասացի՝ ես ճամփորդության էի:

- Ասում են, որ այդ ելույթները ձեր կուսակցությունում գործարար շերտի դժգոհությունն են առաջացրել:

- Անկեղծ ասած՝ եթե Դուք տեղյակ եք, ինչո՞ւ եք ինձնից նման բան հարցնում, ես որ տեղյակ չեմ՝ գոհ են, դժգոհ են, որովհետև ես չեմ մասնակցել այդ հանրահավաքին:

- Իսկ ձեր կուսակցության օրակարգում կա՞ իշխանափոխության խնդիր, թե՞ միայն լոկալ հարցերն են հուզում ձեզ:

- Կուսակցության օրակարգո՞ւմ… իշխանափոխության խնդի՞ր… Հարցը շատ, այսպես ասած, ռադիկալ էր, կարծում եմ, որ նման թեմայի դեռ չենք առնչվել և ոչ էլ ակնարկներ ենք տեսել կամ ստացել, նման հարց չկա: Կարծում եմ, որ մեր համագործակցությունը մյուս ուժերի հետ լինելու է ընդամենը այն հարցերի շուրջ, որոնք կբխեն մեր քաղաքական դիրքորոշումից:

Մանրամասները` թերթի այսօրվա համարում: