Բժշկական կենտրոնում մահացած 2 տարեկան Լիա Միսակյանի գործով նախաքննությունը շուտով կավարտվի

2013-ի հունվարի 2-ին «Արաբկիր» բժշկական կենտրոնում մահացած 2 տարեկան Լիա Միսակյանի գործով նախաքննությունը շուտով կավարտվի, և նյութերը կուղարկվեն կողմերին՝ ծանոթանալու համար: Այս մասին երեկ «Ժողովուրդ»-ի հետ զրույցում ասաց տուժողի իրավահաջորդ Արթուր Սաքունցը: 

Այդ քրեական գործը հարուցվել է մահացած երեխայի հոր 11-ամսյա պայքարի արդյունքում: Նա բժշկական փորձաքննության արդյունքները 2 անգամ բողոքարկել և կարողացել է ապացուցել, որ «Արաբկիր» բ/կ-ի բժիշկներն են եղել իր դստեր մահվան պատճառը:

Թերթը հիշեցնում է, որ հայրը` Գեորգի Միսակյանը, իր դստերը հիվանդանոց էր տարել 2012թ. դեկտեմբերի 31-ին, բժիշկները նրան ասել էին, թե երեխայի մոտ սովորական վիրուս է, կանցնի, սակայն հունվարի 2-ին Լիայի վիճակը բարդացել էր, և նրա կյանքը փրկել չէր հաջողվել: «Ես չէի կարող թողնել, որ իմ երեխայի արյունը չորանար գնար: Այդ վերաբերմունքի արդյունքում այլ երեխաներ կարող են տուժել»,-«Ժողովուրդ»-ին ասաց մահացած երեխայի հայրը:

«Ժողովուրդ»-ը հավելում է նաև, որ «Արաբկիր» բ/կ-ի սեփականատերն ԱԺ պատգամավոր, ՀՀԿ-ական Արա Բաբլոյանն է, որի որդին՝ Արման Բաբլոյանը, ՀՀ առողջապահության փոխնախարարն է:

Մանրամասները` թերթի այսօրվա համարում: