Հայաստանի պետական գանձարանում առկա թանկարժեք իրերի վաճառքի հարցը շատ ավելի հետաքրքիր է, քան կարելի էր կարծել

Հայաստանի պետական գանձարանում առկա ոսկու, ադամանդի և այլ թանկարժեք իրերի վաճառքի հարցը շատ ավելի հետաքրքիր է, քան կարելի էր կարծել: Գրում է «ՀԺ»-ն:

Երեկ ՀՀ կառավարությունը քննարկում էր մի որոշում, որով 2014-2015 թվականներին աճուրդի պետք է դրվի գանձարանում առկա թանկարժեք իրերի մի զգալի մասը: Դա պարզ երևում է ընդունած որոշման ամբողջ տեքստից: Կառավարության որոշման մեջ բերված է նույնիսկ «հրապարակային աճուրդների միջոցով պետական գանձարանում գտնվող պահուստների» ցանկը և այն հերթականությունը, որով դրանք պետք է «իրացվեն»: Եվ այդ ցանկում է, որ նշված են 67 կիլոգրամ ոսկին, 873 կարատ ադամանդը և այլն:

Այս մասին նախորդ օրը մեր թերթում տեղ գտած հրապարակմանը երեկ կառավարության նիստում արձագանքեց ՀՀ ֆինանսների նախարար Դավիթ Սարգսյանը: «Այս որոշումը նաև մեր մամուլի ուշադրությունն է իր վրա սևեռել, բայց խնդիրը հետևյալումն է, որ մեկնաբանվում էր, թե այս որոշումով մենք վաճառում ենք գանձարանում առկա թանկարժեք իրերը, բայց հակառակը' այս որոշման իմաստը չվաճառել այդ թանկարժեք իրերը… »,-ասաց նախարարը: Իհարկե, այս հարցը պարզաբանելու լավ «հարթակ» կլիներ նույն նախարարի այսօր տեղի ունենալիք մամուլի ասուլիսը, բայց երեկ պարզվեց, որ նախօրոք հայտարարված ասուլիսը անսպասելիորեն հետաձգվել է առնվազն մինչև հաջորդ շաբաթ:

«Ակնհայտ է, որ գործ ունենք շատ զգայուն թեմայի հետ»,- գրում է «ՀԺ»-ն:

Մանրամասները` թերթի այսօրվա համարում: