«Նաիրիտի» պարտքի գումարը կարող է աճել

Զարմանալի է, որ ՀՀ քաղաքացիները Մոսկվայի արբիտրաժային դատարանի չորեքշաբթի օրվա որոշումից միայն իմացան, թե որքան է պարտք «Նաիրիտի» սեփականատեր Rhinoville Property Limited ընկերությունը «Մեժգոսբանկին»: Գրում է «Հրապարակ»-ը:

Բավարարելով ԱՊՀ երկրների կապիալով գործող այս բանկի հայցն ընդդեմ ընկերության և գանձման ենթակա գումարը սահմանելով, դատարանը հետաքրքիր թվաբանություն ի հայտ բերեց, որի հրապարակումից մեր պաշտոնյաները՝ էներգետիկայի նախարարությունը և «Նաիրիտ» ՓԲԸ-ն, խուսափում էին, կարծես այս ժողովուրդն այլևս կապ չունի իր քիմիական հսկայի հետ, և վերջինիս ճակատագրի լուծումը մի խումբ բարձրաստիճան պաշտոնյաների արտոնյալ իրավունքն է:

Rhinoville Property Limited ընկերությունից, ըստ մոսկովյան դատական ատյանի որոշման, ինչպես հայտնի է, գանձվելու է 107,95 մլն դոլար, որից 68,6 մլն դոլարը՝ հիմնական պարտքի գումարից, իսկ մնացած 39,95 մլն-ն պարտքի տոկոսներն են:

Թերթը հիշեցնում է, որ ՀՀ վարչապետը, իր տարեվերջյան ասուլիսում պատասխանելով «Հրապարակի» հարցին, թե որքան է կազմում «Նաիրիտի» պարտքը ռուսական բանկին գրավադրման օրվանից, պատասխանեց, որ ինքը ստույգ հաշվարկ չունի, քանի որ այդ թիվն անընդհատ փոփոխվում է.

««Նաիրիտը» չի կարողանում կատարել իր պարտավորությունները «Մեժգոսբանկի» նկատմամբ, և կարծում եմ, որ ամեն օր էլ «Նաիրիտի» պարտքի գումարը կարող է աճել, և դա «Մեժգոսբանկի» կողմից ռիսկայնության գնահատման մեթոդաբանության ներքո հաշվարկվող գումարներ են: Այդ մեթոդաբանությունը կարևոր է, և եթե տույժ-տուգանքներով հաշվարկեն, պարտքի գումարը կարող է լինել երեք անգամ ավելի, քան այն գումարն է, որը հաշվարկում է «Նաիրիտը»: Այս պահին չեմ կարող ճշգրիտ ցուցանիշ արձանագրել, որովհետև ամեն ամիս այդ թիվը փոխվում է, բայց 100 մլն-ից ավելի կլինեն այն վարկային միջոցները, որ տրվել են «Նաիրիտին»»:

Փաստորեն, կառավարության ղեկավարը նույնպես խուսափեց հստակ թիվ նշելուց: Տեղեկացված աղբյուրը հայտնում է, որ գործարանն ունի 175 մլն դոլար պարտք, որից 70 մլն-ն գոյացել է գործարանի գրավադրումից: Rhinoville Property-ն մոտ 2 մլն-ն փակել է, և մնացել է մոտ 68 մլն, գումարած 100 մլն, որը 2009 թվականին երկու տրանշով վերցրել է «Մեժգոսբանկից»: Թե ինչպես է վերադարձնելու այս պարտքերը գործարանը, որը գործարքում հանդես է գալիս որպես երաշխավոր, բայց չի կարողանում նույնիսկ աշխատավարձ վճարել, հայտնի չէ:

Մանրամասները` թերթի այսօրվա համարում: