Ի՞նչ է նշանակում 5 օրվա ընթացքում Երևանի թվով 21 մանկապարտեզներում մատակարարներին 38 անգամ վերադարձնել ժամկետանց սնունդը

Ի՞նչ է նշանակում 5 օրվա ընթացքում Երևանի թվով 21 մանկապարտեզներում մատակարարներին 38 անգամ վերադարձնել է ժամկետանց սնունդը:

Պարոն Տարոն Մարգարյանին

Երևանի քաղաքապետ

Հարգելի պարոն Մարգարյան,

Հունվարի 20-ին կայացած Երևանի քաղաքապետարանի աշխատանքային խորհրդակցության ժամանակ զեկուցվեց N242 հսկողականի մասին, որը տրվել էր հունվարի 13-ին և կատարման ժամկետն էր հունվարի 20-ը: Այն վերաբերում էր մայրաքաղաքի մանկապարտեզներում սննդի որակի նկատմամբ հսկողությանը' բացառելով ժամկետանց սննդի օգտագործումը: Զեկուցեց քաղաքապետարանի աշխատակազմի վերահսկողության վարչության պետ պարոն Սիմոնյանը, ով ներկայացրեց, որ անցյալ շաբաթվա ընթացքում աշխատանքային շրջայցեր են կատարվել մայրաքաղաքի 21 մանկապարտեզներում և մեկ շաբաթվա ընթացքում ստուգողները 38 անգամ վերադարձրել են օրվա ստանալիք սնունդը: Ընդ որում Աջափնյակի մանկապարտեզներից 11, Արաբկիրի մանկապարտեզներից 22, Շենգավիթից' 1, Դավթաշենից' 4 անգամ: Արձանագրություններ չեն կազմվել:

Խնդրում եմ ստուգումների մասին տրամադրել հետևյալ տեղեկությունները.

Ստուգող հանձնաժողովի կազմը,

Ո՞ր 21 մանկապարտեզներում են իրականացվել ստուգումները,

Երևանի մանկապարտեզներին սնունդ մատակարարողների ցանկը' ըստ վարչական շրջանների մանկապարտեզների,

Եթե տվյալ օրը մեկ անգամ է մանկապարտեզը սնունդ ստանում, ապա 21 մանկապարտեզներում ամենաշատը 21 անգամ կարող էր ստացվելիք սնունդը վերադարձվել, ուրեմն ինչպե՞ս հասկանալ, որ օրինակ Արաբկիրի մանկապարտեզներից 22 անգամ այն վերադարձվել, ինչպե՞ս է կազմակերպվել երեխաների սնունդն այդ օրը:

Շնորհակալություն համագործակցության համար:

Հարգանքներով՝

Անահիտ Բախշյան
Երևան քաղաքի ավագանու «Բարև Երևան»