Սերժ Սարգսյանի երիտասարդությունն ապահովված է (ֆոտո)

Հունվարի 9-17-ին Հայաստանի Հանրապետության նախագահ Սերժ Սարգսյանը կորեական հիվանդանոցներից մեկում երիտասարդացման բուժման կուրս է անցել: Նրա հետ միասին Կորեայում են եղել նաև ԼՂՀ նախկին նախագահ Արկադի Ղուկասյանն ու գործարար Արա Աբրահամյանը: Նախագահին ուղեկցել են ազգային անվտանգության ծառայությունը և պատվիրակության մյուս անդամները. փոխանցում է chosun.com-ը:

«Չաում»-ը CHA Health Systems ընկերության կողմից ղեկավարվող վերականգնողական կլինիկա է։ Պատվիրակության ներկայացուցիչները մեկ շաբաթ շարունակ ամեն օր այցելել են հիվանդանոց եւ բուժման կուրս անցել, այդ թվում ցողունային բջիջների, ծերացման դեմ, մերսումների եւ քաշի վերահսկման համար:

Բուժման համար ընդհանուր առմամբ վճարվել է մոտ 186 հազար դոլար` 200 մլն կորեական վոն:

Նշենք նաև, որ տեղեկատվության տարածվելուն պես Epress.am-ի հարցմանն ի պատասխան ՀՀ նախագահի մամուլի քարտուղար Արման Սաղաթելյանն ասել է. «Ես բազմիցս հերքել եմ ու կրկին հերքում եմ այն անհեթեթ ասեկոսեները, թե իբր Նախագահ Սերժ Սարգսյանը առողջական խնդիրներ ունի: Դա իրականությանը չի համապատասխանում: Ինչ վերաբերում է ս.թ. հունվարի առաջին կեսին Նախագահի արձակուրդի վերաբերյալ հարցերին, ապա ինչպես արդեն նշել ենք, այն կրել է մասնավոր բնույթ, հետևաբար և մանրամասների մասին հրապարակային տեղեկատվություն չի տրվել:

Արձակուրդի ընթացքում, իմ տեղեկություններով, Նախագահը առողջապահական կենտրոն էլ է այցելել, սակայն ոչ թե բուժման, այլ կանխարգելիչ առողջարարական նպատակներով: Ձեր նշած գումարը ոչ թե միայն Նախագահի, այլ ամբողջ խմբի կողմից ստացած ծառայությունների վճարն է: Սերժ Սարգսյանին մատուցված ծառայությունների վճարն ամբողջի մի մասն է միայն, որը շատ անգամ պակաս է նշված գումարից, և այդ մասի վճարումը կատարվել է նրա անձնական հայտարարագրված միջոցների հաշվին»