Ինչպես է Վանո Սիրադեղյանը վնասազերծել քրեական հեղինակություն Թևոսիկին ու նրա տղաներին

«Հրապարակ»-ը մանրամասներ է հրապարակել քրեական հեղինակություն Թևոս Սաֆարյանի՝ Թևոսիկի մասին, ում եղբորը՝ Արթուր Սաֆարյանին օրերս սպանեցին Երևանի Սարյան փողոցում:

«Ժամանակին նա մեծ փոթորիկներ է արել նաև Մոսկվայում, որտեղ նկատելի ֆիգուր էր դեռ 90-ականներին: Հիշարժան է «տոմսերի» պատմությունն այն մասին, թե ինչպես 1994 թ. մարտին ՀՀ ՆԳ նախարար Վանո Սիրադեղյանը Մոսկվայի «Վնուկովո» օդանավակայանում վնասազերծեց Թևոսիկի ղեկավարությամբ գործող հայերից կազմված հանցագործ խմբին, որի անդամները գոյություն չունեցող մարդկանց անուններով գնում էին ինքնաթիռների տոմսեր և մի քանի անգամ թանկ վերավաճառում Երևան թռչողներին:

Այն ժամանակ Սիրադեղյանի հանձնարարությամբ օպերատիվ խումբը հասարակ քաղաքացիների անվան տակ Մոսկվայում Թևոսիկի խմբի անդամներից թանկ տոմսեր գնեց, ապա պահանջեցին նրանցից, որ իրենց ուղեկցեն ինքնաթիռ, քանի որ գնված տոմսերն ուրիշների անուններով էին: Բանդիտները, որոնք գործում էին Մոսկվայի իրավապահների տանիքի տակ և ազատ ելումուտ ունեին ինքնաթիռ, կատարեցին պահանջը և կալանավորվեցին հենց շարժասանդուղքի տակ:

Թևոսիկի անունը, որպես գլխավոր կասկածյալի, շոշափվեց 1998 թ. Մոսկվայում սպանված հայ բիզնեսմենի՝ ոմն Հովսեփյանի սպանության գործում, սակայն նրան հարցաքննել չհաջողվեց, քանի որ նա ինչ-որ հրաշքով արտասահմանյան անձնագիր ստացավ և, ըստ մոսկովյան մամուլի, մեկնեց Եվրոպա, հետագայում խնդիրներ ունենալով Բելգիայի, Շվեյցարիայի և Իտալիայի իրավապահների հետ»:

Մանրամասները՝ թերթի այսօրվա համարում