«Արտակարգ դրության իրավական ռեժիմի մասին» օրենքում փոփոխություններ կատարելու ՀԱԿ նախագիծը մերժվեց

Կառավարությունն այսօրվա նիստում բացասական եզրակացություն տվեց ԱԺ ՀԱԿ խմբակցության պատգամավորների կողմից ներկայացված «Արտակարգ դրության իրավական ռեժիմի մասին» Հայաստանի Հանրապետության օրենքում փոփոխություններ կատարելու մասին» Հայաստանի Հանրապետության օրենքի նախագծին:

«Նորից վեր են բարձրացվում հարցեր, որոնք քննարկվել են, թե օրենքի ընդունման ժամանակ և թե դրանից հետո ևս մեկ նախաձեռնություն եղել է, որը հանվել է շրջանառությունից:

Հարցը վերաբերում է Արտակարգ դրության ժամանակ զինված ուժերի օգտագործմանը: Պատգամավորներն առաջարկում են միանգամայն այլ ռեժիմներ: Այս հարցը բազմիցս քննարկվել է: Մեր զինված ուժերը բացի տարածքային ամբողջականությունից ապահովում են նաև անվտանգություն, որն իր մեջ է երառում նաև ներքին անվտանգությունը»,-ասաց ՀՀ արդարադատության նախարար Հրայր Թովմասյանը: