Հրաչ Քեշիշյանի ֆեյսբուքյան ասուլիսը վերջնականապես տապալվել է

Այսօր «Ֆեյսբուքյան ասուլիսը» Հրաչ Քեշիշյանի հետ չի կայանա, քանի որ նա հրաժարվել է մասնակցել հաղորդմանը՝ նպատակահարմար չհամարելով պատասխանել օգտատերերի հարցերին: Ռեժիսորը նախատեսված ասուլիսի հետ կապված գրել է.

«Ես վստահ եմ, որ մեր երկրում ապրում են ողջախոհ ու դաստիարակված մարդիկ։ Ես միշտ համարել եմ Ազատություն ռադիոկայանը առաջադեմ ԶԼՄ։ Բայց երևի Ազատությունը ևս էժանագին մոդայի ետևից ընկնելով, փորձում է վարկանիշ հավաքել ոչ տրադիցիոն, ցածրորակ էպոտաժի միջոցով։ Երևի Ազատությունը մոռացել է, թե որտեղ է վերջանում իր ազատությունը… Այդ դեպքում հորդորում եմ վերանայել այն ֆորմատը, որով այժմ առաջնորդվում է այս բազմամյա փորձով ալիքը, իսկ որպես հրավիրյալ, իրավունք եմ ինձ վերապահում չգնալ մի տեղ հյուր, ուր անցնում են ուրիշի ազատության սահմանը։ Հորդորում եմ իմ բոլոր ընկերներին հրաժարվել նմանատիպ ինտերվյուների հրավերներից։ Ես բոյկոտում եմ այն լրագրությունը, որը հիմնվում է հարգանքի դիֆիցիտում ծնված ու անդաստիարակության մթնոլորտում մեծացած մի քանի այսպես ասած օգտատերերի ակտիվության վրա։ Իմացեք ձեր տեղն ու եթե ձեր խիղճն ու վաստակը թույլ տա, փորձեք ապրել խաղաղությամբ»:

Նշենք, որ ֆեյսբուքյան բազմաթիվ օգտատերեր ծաղրանքի և վիրավորանքի տարրեր պարունակող հարցեր և մեկնաբանություններ էին գրում` այդ կերպ իրենց վերաբերմունքը արտահայտելով Հրաչ Քեշիշյանի նկատմամբ:

Ստորև ներկայացնում ենք դրանցից մի քանիսը.

«Ես լավ գիտեմ, որ կինոն Ձեզ համար պարզապես փող վաստակելու միջոց է և ՎԵՐՋ: Այստեղ հարց է առաջանում' չե՞ք ամաչում»:

«Հրաչ ինչի չեք նկարում ֆիլմ Գալուստ Սահակյանի մասին «Հալածված Փիլիսոփան» վերնագրով»:

«Ճի՞շտ են լուրերն այն մասին, որ Դուք նկարելու եք հայ ազգի զավակ Ալեքսանդր Սարգսյանի կյանքին ու գործունեությանը նվիրված «Մարդը փայի մեջ» կիսամետրաժ ֆիլմը»:

«Ձեր կարծիքով ՏԵՌՄԻՆԱՏՌՆԱ ուժեղ թե՞ ԲՌՈՒՍԼԻՆ»:

«Դուք համապատասխանո՞ւմ եք միջազգային ստանդարտներին»:

Հարցի առնչությամբ լրատվամիջոցը պարզաբանել է.

«Հարկ ենք համարում հիշեցնել, որ «Ֆեյսբուքյան ասուլիս» հաղորդաշարի ձևաչափը Facebook սոցիալական ցանցի օգտատերերի հարցերին հյուրի՝ մեր ուղիղ եթերում պատասխանելն է: «Ազատություն»-ը տվյալ դեպքում չի որոշում հարցի բովանդակությունը, այդ թվում՝ դրա սրությունը կամ դրանում առկա հեգնանքը, այլ ընդամենը հետևում է, որպեսզի այն չպարունակի անձնական վիրավորանք, սպառնալիք, բռնության կոչ և այլ արտահայտություններ, որոնք թվարկված են մեր կանոնակարգում: Նման արտահայտությունների առկայության դեպքում հարցերը ջնջվում են մեր կողմից:

Լինում են նաև հարցեր, որոնք թեև Facebook-ում չեն ջնջվում մեր կողմից, սակայն չեն էլ հնչեցվում եթերում, քանի որ, չհակասելով հանդերձ մեր կանոններին, չեն առնչվում հաղորդման հյուրին կամ նրա գործունեությանը»: