Հայաստանը շարունակելու է սերտ համագործակցությունը Եվրամիության հետ. Արթուր Բաղդասարյան

Հայաստանը շարունակելու է սերտ համագործակցությունը Եվրամիության հետ ինստիտուցիոնալ բարեփոխումների իրականացման համար: Այս մասին փետրվարի 1-ին լրագրողների հետ հանդիպմանն ասաց ՀՀ Ազգային անվտանգության խորհրդի քարտուղար Արթուր Բաղդասարյանը:

«Վերջին շրջանում շատ է խոսվում այն մասին, որ Մաքսային միությանն անդամակցելու որոշումից հետո մեր հարաբերությունները Եվրամիության հետ վատացել են, սակայն դա այդպես չէ: Մենք արդեն հաստատել ենք 2014-2015 թվականների` Եվրամիության հետ համագործակցության ռազմավարության ծրագիրը, որը պարունակում է 160 գործողություն` տարբեր ոլորտներում բարեփոխումներ իրականացնելու համար»,-ասել է Բաղդասարյանը:

Վերջինիս խոսքով` ԵՄ-ի հետ համատեղ իրականացվող բարեփոխումները վերաբերում են քաղաքական ոլորտին, դատական, մարդու իրավունքների պաշտպանության, սոցիալական և այլ ոլորտներին: «Եվրոպական Միության հետ տնտեսական համագործակցությունը կշարունակվի այնքանով, որքանով դա չի խանգարի մեր անդամակցությանը Մաքսային միությանը»,- նշեց Բաղդասարյանը:

ԱԱԽ քարտուղարը տեղեկացրեց, որ շարունակվելու են ԵՄ-ի հետ համատեղ իրականացվող կարևորագույն ծրագրերը՝ «Թվինինգ», «Թայեքս», «Սիգմա»: