Հայ զբոսաշրջիկները շարունակում են նախընտրել եգիպտական ափերը

Չնայած Եգիպտոսի քաղաքական լարված իրավիճակին' հայ զբոսաշրջիկները ցանկանում են իրենց հանգիստը վայելել այնտեղ: Հայկական զբոսաշրջային կազմակերպություններն առաջարկում են մատչելի տուրեր դեպի Շարմ Էլ Շեյխ, որտեղ մարդիկ կարող են վայելել ծովափնյա հանգիստ: «Գոլդ թրեվլ» գործակալությունից «Արմենպրես»-ը տեղեկացավ, որ գների նվազման հետևանքով նույնիսկ ավելացել են ուղևորությունները դեպի Շարմ Էլ Շեյխ: Գործակալությունները զբոսաշրջիկներին հիմնականում խորհուրդ չեն տալիս գնալ Կահիրե, տուրեր այդ ուղղությամբ չեն կազմակերպում, գնալու դեպքում էլ խորհուրդ են տալիս հյուրանոցից դուրս չգալ:

«Զիոն» գործակալությունը նշում է, որ զբոսաշրջիկները գոհ են վերադառնում Եգիպտոսից, քանի որ շատ շահավետ ճամփորդություն է: Հայ զբոսաշրջիկները Վրաստանով էին ուղևորվում դեպի Շարմ Էլ Շեյխ, իսկ արդեն բացված Երևան-Շարմ Էլ Շեյխ ուղիղ չարտերային չվերթն էլ ավելի է նպաստում զբոսաշրջիկների հոսքին դեպի Եգիպտոս:

«Իմեգա տուրը»-ից հայտնել են, որ էական փոփոխություն գրեթե չկա, որովհետև Եգիպտոսի ներքաղաքական դրությունն այնքան լարված չէ, որքան ամռանն էր:

Զբոսաշրջիկները հիմնականում գոհ են, չնայած շատերին չի բավարարում միայն ծովափնյա հանգիստը. նրանք ցանկանում են նաև տեսնել Կահիրեն, ծանոթանալ հին եգիպտական մշակույթին: Նման ցանկության դեպքում, որքան էլ ռիսկային լինի, զբոսաշրջիկները կարող են Շարմ Էլ Շեյխից ուղևորվել Կահիրե, ինչպես նշել է «Գլոբուս տուրս» կազմակերպության ներկայացուցիչը: Այս կազմակերպությունը փորձում է հնարավորինս խուսափել դեպի Եգիպտոս ուղևորություններ կազմակերպելուց' ապահովելով զբոսաշրջիկի անվտանգությունը, ինչը նրա համար առաջնայինն է:

Եգիպտոսում իրավիճակը սրվել է 2013թ. հուլիսի 3-ից հետո, բանակի հրամանատարության կողմից նախագահ Մուհամեդ Մուրսին հեռացվել էր նախագահի պաշտոնից, մեկուսացվել շրջապատից և տեղափոխվել Պաշտպանության նախարարություն: Ավելի ուշ հայտնի էր դարձել, որ մուրսին և նրա կողմնակիցները ձերբակալվել են: Այդ երկրում բախումները Մուրսիի կողմնակիցների և նրան դեմ ուժերի միջև մերթընդմերթ սուր դրսևորումներ են ստանում: ՀՀ արտաքին գործերի նախարարությունը նախորդ տարի ամռանը խորհուրդ էր տվել Հայաստանի քաղաքացիներին առանց հույժ անհրաժեշտության զերծ մնալ Եգիպտոս այցելություններից: